Gait van de Renderklippen

't Meneertien van de Krante lup um zelf veurbie met 't schrieven van boeken. Hee is noe druk doende met 't uutpluzen wat de mensen in onze umgeving heb mee emaak in die bange tied. Dat dut hee samen met Roel. Die beien bint vaker onderweg as tuus. De veurzitter van 't spul hef een eenzijdige burnout op elopen bie die alderkeizerse ommenullig schiere tentoonstelling op de Hagedoorns Plaatse en hef Roel en um de zegen egeven veur un serie boeken. Ze begint d'r mee i n Une temee. 't Knuffeltien zeg dat hee zo hard lup dat hee zichzelf tegen 't achterwâârk kan kieken. En dan krie-j ok dat d'r wel is ietsies verkeerd geet. Kottens bie Roel thuus waren ze zo verhit in gesprek aover de pegels dat 't mannegien niet deur had dat d'r een kuukien an de ene kante lag en een kippepeutien of iets dargelijks veur de hond an de andere kante. Wil van Roel zak mar zeggen wol um nog tegen hollen mar dat peutien soppen hee al in de koffie. 't Is um niet in de sloeke blieven stèken gelukkig mar helemaole gerust d'r op waren ze ok niet. ,Straks begin ik tuus an de Ramabuurte nog te blaffen", zei hee umme effies later weer in de hande te nemen wat hee juus bie Roel had ofegeven. Ze heb die aomd wel veur mekare ekregen dat ze 't buukien betaalbaar kunt maken. As de sponsors links en rechts met wâârk. ,,En dat heww dan toch mar mooi verdiend Roel", zei hee. 't Is mar goed dat de sleutels van een auto niet op elke anderen pas want anders was hee misschiens nog wel met de auto van iemand uut de buurte d'r vandeur egaon. Ik denke dat ze die wèke zon twintig uur de voeten bie anderen onder de taofel heb esteuken. Allemaole oldere mensen die hele verhalen aover de Pruus te vertellen heb. Ie wilt niet weten wat ze hier in de buurte allemaole heb belèèf. A-j wel interesse heb dan mu-j 't boek aover Une mar is lèzen. A-j in gevaor komp dan stijg ie baoven oe zelf uut wat slimmigheid betref. In disse krante zal temee wel staon hoe of ie an 't boek kunt komen. Affein, nao een darde köppien koffie worden 't tied umme op huus an te gaon. Daor had 't Knuffeltien al een uur of wat op um zitten wachten. Die was nao al die ofwezigheid al wat krang in de huud. En 't worden d'r niet bèter op toe hee de gashandel lös dee-j aover wat hee met Roel had deur espreuken. Dat ze toch mar mee mooi in een paar uur tied een honderd of wat verdiend hadden met slimme zetten . ,Dan zal ik oe vertellen hoe a-j in een paar flitsen net zoveule kunt kwiet raken", was 't antwoord. En met gooien ze um een paar pampierties veur de snufferd. 't Meneertien trök wit weg. Twee bekeurings: ene veur te hàrd riejen en de ander veur 't gegeven dat de wetgever 't stuven deur 't alternatieve gruun niet erkent. Samen goed veur een bedrag waor een mense de stàrns van veur de ogen krig. ,Akelige soezerd. Hersenloze knuppel"en meer van dat soort kritiek kreeg hee aover zich hen. De andere dag hef hee Roel in elich. ,, Ik bin mien toch ofeblaf jonge. Zol dat grei veur dee hond dan toch besmettelijk waen?" Roel kwamp niet meer bie. ,Kom ie aover de hond dan ok aover de stàt"zeg hee en dat is niet zo muuilijk as 't umme de hond Bouffon van Annegien geet. De groetenisse. GAIT.