Vrouwluu op 't pluus

Merie kump op mien afvliegen, duwt mien de krante onder de neuze en zeg: ,,Hier Gait, lèzen die handel. Op de Noordoost Veluwe begint de victorie." En umme elke ontsnapping meugelijk te maken had ze de fokke in de ene hand en de duum van de andere klavier bie een groot artikel. Dat ging aover de kandidatuur van Tanja Haseloop-Amsing veur burgemeester van Oldebroek.'t Is mien vergeven Tanja, mar wat mien metene in de gedachten scheut is dat de haze op de Veluwe de leste tied anders loop dan in de honderd jaor die d'r an veuraf gingen. ,,'t Gif oe gien pas mannegien umme daor geinties mee te maken. 't Is de hoogste tied dat d'r een ende kump an dat haantjesgedrag van de manskêêls. Wat dat angeet heb ze 't bie de Kroon goed in de smiezen. Ie ziet wat Maxima allemaole op de vörk nemp. Daor kunt de mansluu nog een bonke van leren.

In Heerde is Inez goed bevallen, daor heb ze noe met Jacqueline noe al de tweede vrouwe in kotte tied op 't pluus." Ik sputteren nog tegen dat in Epe de ene Lente gien zomer hef emaak, mar veur die opmarking mut ik mien van eur schamen. ,,Let mar is op Gait wie temee Hans van der Hoeve op geet volgen. Dat wordt vast een vrouwe." ,,Kan ik mien veurstellen, dan heb ze de theekrans compleet", waogen ik 't d'r op, mar toen mos ik gelieke bukken, want de stoffer kwam met grote snelheid mien richting uut. Ik hebbe mar veur mien ehollen dat ze in Oldebroek een Leek heb benuump….Of heet iemand uut die plaatse een Leekse? Daor komp wie temee wel achter as ze officieel is benuump en zichzelf veurstelt.

Jacqueline uut Heerde is helemaole niet verbaasd dat d'r zoveule vrouwluu hier benuump wordt. In eur ogen bint d'r genog wieze vrouwen die de verantwoordelijkheid veur een gemeente kunt dragen. Die haalt de scharpe kanties d'r of. En wule heb ok niet zoveule muuite umme ongeliek te bekennen, zeg Merie. Die keek aover mien scholder mee aover een stuk wat ik an de raod van Elburg bestede. Daor hef wetholder Sneevliet 't spit mien ezeg aover de holding van 't college in de kwestie van 't Brigadegebouw in 't Harde. Burgemeester Jan Nathan Rozendaal en de drie mannelijke wetholders lieten eur de kastanjes uut 't vuur halen. Merie is van mening dat de vier kêêls in 't college zich mutten schamen dat ze een vrouwe veur 't karregien spant. Zo zollen die vier mansluu 't nog as een zwaktebod kunnen verkopen.

Ik heb niet eprobeerd umme eur uut te leggen dat dit een kwestie is van portefeuilles. Ze hef noe de hand al op de knippe, umme aover een portefeuille mar helemaol niet te praoten. Ik denke dat 't een kwestie van strategie is. Met al die vrouwluu as hoeder van de gemeentes kunt ze noe bie grote problemen niet meer zeggen dat d'r gien moeder lief meer an kan helpen. En 't wark ok op een andere maniere.

Kottens kwammen Jacqueline Koops en wetholder Yasemin Cegerek in dezelfde gèle jurken op de parsconferentie en wat denk ie? Een wèke later volgen wetholder Jan Berkhof en gemeentesecretaris Ben van Zuthem 't veurbeeld met blauwe broeken. Dus gien angst veur een klerezootje….Luu, Merie schudt 't wieze heuf en dan haok ik af. Groetenisse van GAIT.