Vrogger niet alles bèter

Ie kunt sommige veurvallen in oe lèven nóg zo diepe wegstoppen, op een gegeven moment kump 't toch weer nao baoven. Nee, dit keer gien stuksien van Gait op de lollige tour. Iets wat ik namens 't Meneertien van de Krante van um en van mien ofschrieven wille. Ik kan mien niet veurstellen dat ule 't artikel in 't dagblad aover Kim van der Hoef heb emist. Die zit dichte bie 't Knuffeltien van 't Meneertien in de parmetaotsie. Eur vriend Kurt is een tweeling rieker, mar hef zien vrouw bie de bevalling verleuren.

,,Dan hef een mense pech", zei d'r ene op de sportschoele tegen 't schrievertien. Mar 't is natuurlijk veule meer dan dat. Bie pech denk ie in 't slimste geval dat oe de fietse wordt esteulen of da-j de busse mist. Dit graaf veule dieper. Dit is iets wat oe vàddere lèven bepaalt, waor a-j nooit meer van los komp. Dat hef dus 't Meneertien ok emärk. Lange lange geleen heb hee en 't Knuffeltien nao twee dagen ofscheid mutten nemen van eur dochter Petra. Een name die pas sinds kort mog worden ineschreven. En 't verschrikkelijke veurval in Nijmegen halen alles weer nao baoven. D'r bint genog redenen an te voeren weurumme 't vrogger bèter was. Menselijk contact, burenhulpe…. Toch is dat betrekkelijk. Kurt maken 't zelf bekend via de Sociale Media. 't Fenomeen waor aj bedenkingen bie kunt hebben as luu d'r slecht mee umme sprink.

In dit geval hef 't zien nut bewezen. Dikke duzend reacties heb de ongelukkige vader een hart onder de riem esteuken. Dat was een halve eeuw geleen niet meugelijk. Gien sociale media, mar de mensheid was d'r ok niet an toe. Zoiets mos ie wegstoppen ;met een baoge um hen lopen. 't Meneertien krig d'r nog een brok in de kèèl van as hee de geboorte van Petra weer veur de gees haalt. Medisch lagen ze toen een ende achter en helemaole op 't psychologische vlak. Toen bleek dat 't kind d'r slecht an toe was vègen een hoofdverpleegster in 't Juliana ziekenhuus um de kaste uut en niet zo zunig ok. Wat of hee wel veur een vader was….Hee moch nog effies 't Knuffeltien gedag zeggen en toen maken dat hee weg kwam. ,,Ik heb onderweggens nog nooit zoveule kinderkoetsen ezien Gait. Een buurvrouwe kwamp an de deure en mopperen mien een dag of wat later ok nog af, want ik had helemaole niet verteld dat 't kind nog lèven en nao Leiden was ebracht." Ja, dat kloppen, mar náodat de babie was estòrven en knappe koppen in Leiden uut gingen zuken wat of de oorzaak ewes kon wèèn…..

En as oe umgeving zo reageert dan durf ie d'r helemaole niet aover te praoten. Stop ie 't weg. 't Passen niet in die tied umme daor iemand mee lastig te vallen. 't Meneertien gif met naodruk an dat wat Kurt en Kim is aoverkomen tien keer slimmer is. Mar dat de mensheid wel een slag hef emaak. 't Ziekenhuus in Nijmegen ging nao dit vreselijke veurval de hele middag dichte. Via de Sociale Media opbeurende woorden. Daor is veur Kurt de smart niet minder umme mar hee hef in elk geval wel emààrk dat d'r medemensen bint die um 'm geef. Vrogger was alles bèter. Laot oe niet in slaop sussen jonge mensen, ome Gait weet wel bèter. En 't Meneertien kan 't proces noe eindelijk afsluten. Een stevige klavier van GAIT.