Roel maak een kolde noodstop

A-j Roel aover 't darp ziet zwabberen dan mu-j daor gien verkeerde gedachten bie hebben. Hee is alderkeizers zunig met 't gebruuk van alcohol. Nee, de grootgrondbeheerder van aover 't Kanaal is lelijk te passe ekomen. Eigen schuld dikke bult. Nao met die bult völt 't nog wel mee, mar de ribbekaste is 'm te hetter en te fletter eslagen en daor lup hee dan ok nao. Dus a-j 'm ziet schuven dan is 't niet dat hee ââns een plekke zuch umme te wateren. Roel hef altoed haos. Dat krig Wil 'm mar niet of eleerd. Bint ze saampies nao de herdenkingsplekke an de Wachtelenbergweg gaon kieken. Nemp ze vol indrukken niet effies de tied umme op een terrassien bie te komen. Dat is altied verstandig wanneer ie net as hee nauw bie de oorlogsgeschiedenis bint betrökken. In dit geval via 't Doorgeefluuk, samen met Henk Streekmuseum Radstake en 't Meneertien van de Krante. Die heb al vier buukies, wat zeg ik, boeken, eschreven aover wat zich hier in de umgeving in de Tweede Wereldoorlog hef ofespeuld. Gien denken an een stop. 't Worden een noodstop, mar daoaover praot ik ule bie. Nee, dat mos zo neudig met een ijssien op de vuus weer op huus an. Wil kon 'm egees niet biehollen. Ze hechten nao aosem. Gien wonder da-j dan as de gelègenheid zich veur dut een stukkien of wilt sniejen. Ze heb nogal wat kennissen op 't darp dus gunk regelmaotig de ene hand, die zonder de ijsco, de luch in. Op 't punt waor de Haverkampsweg de Hoofdstraote an tik schreeuwen Wil: linksaf Roel. Met de toef in de wind en de gang in de wielen drung dat nog niet zo gauw töt 'm deur. Dus gooien Wil d'r nog effies wat meer geluud tegenan. Ondertussen zat hee al half in de bocht.

Gien tied dus umme op een normale maniere te reageren. Hee gooien 't stuut bots umme met de haope de ofslag te doen zoas 't mut met as tweede optie de struken van Stoevenbeld zak mar zeggen. 't Worden de dàdde optie. Die van 't midden van de Hoofdstraote waor hee een noodlanding maken. Wil jammeren al dat hee kold an vulen. Dat was ok zo, mar niets umme eur druk aover te mutten maken. 't Restant van 't ijssien was 'm op zien gezichte esmölten. Met een helen hoop gemàttel en nog veule meer gemier hef hee de thuushaven bereik. Mar daor gruuien de piene met de minuut. ,,En noe he-k van ie ijsco de helfte ok nog niet ehad", jammeren hee op de divan.

De nekke drèèjt ok niet meer zo as dat zol mutten. Hee kan wel knikken van onder nao baoven mar niet van links nao rechts en zien stemmegien halen de eerste versnelling nog niet. Daor maak Wil noe slim gebruuk van. ,,Roel, gao-j vanaovend mee een entien umme?" Hee wol knikken, mar 't worden gejammer. Op alle monumenten dat hee nee mut schudden is hee de pisang. Niet umdat hee aover een bananenschille is uut egleden, mar dat weet ule as gien ander. Die meratten daor op de Hoofdstraote bint 'm dus kold op 't dak evallen. Dat mu-j lijdzaam verteren en dat worden in zien geval asfalteren. Hee is in elk geval niet van plan umme zien schoonmoe nao te doen want die hef twee keer achter mekare de pols ebreuken. Een halve ijsco was al een rib uut zien lief.

Ontvank de groetenisse van GAIT.