Heerde mut de geschiedenisboeken in

De gemeenten Epe en Heerde heb mot met mekare. Heerde kan mar niet begriepen dat de buren gien interesse heb in een bemuuial van de provincie die uut mut  zuken welke gemeenten 't op de Noord Veluwe met mekaar kunt doen. Tja, ik nemme 't Jacqueline niet kwaolijk dat ze de de rebbel d'r aover reurt. Ze zit nog  tekort op 't pluus. As ze de geschiedenis d'rop nao had eslagen was ze wel anders veur de draod ekomen. De gemeente Heerde warken ooit samen met Epe  binnen de Stedebouwkundige Dienst Oost Veluwe, de veurloper van de Stedendriehoek, nam de bene, stappen richting de Noord Veluwe, knuppen banden an met Zwolle. Umme anslutend een pirouet in de drèèjkonterieje te verwarken en met Hattem en Oldebroekin berre te krupen. Een alderkeizers betrouwbare partner zo a-j ziet.

Dat Heerde noe weer op 't olde honk terug is ku-j veurtschrijdend inzicht numen. Mar dat d'r buren bint die dat geschuvel niet bint vergèten zal Jacqueline wel mutten begriepen. Ze hef daor zelf part noch deel an, mar oe veuraf op de heugte stellen kan gien kwaod. Mu-j dan de vlagge uutstèken veur Epe? Wèès wiezer. Met een Vaossense burgervader en een petieje uut Vaossen die 't in Epe veur 't zeggen hef bint ze daor grootstedelijk gaon denken. Liever een verre vriend dan een goede buur. Epe as de kruuwagen van Apeldoorne.

Merie tik mien op de scholders. ,,Gait, Apeldoorne is de buur van Vaossen, ie mutten 't allemaole wel in zien verband zien." Noe schut mien te binnen dat 't college uut Heerde bee en wee van Epe an taofel hef eneug. Jongens, dat kan wat worden. 't Is d'r de tied niet nao anders kwam d'r vast en zeker Heite Bliksem op de taofel. Ik haope dat 't veur Heerde trouwens allemaole goed kump en dat ze niet e isaleerd wordt, umme 't zo mar is te zeggen. Want gao mar nao, Hattem kus d'r veur umme zich onder de banier van Zwolle te scharen.

,,Ule bint temee de achtertuin van de blauwvngers", zei kottens Clemens Cornielje, de veurege Dromedaris van de Koneginne. Niet zo as ik 't hier schrieve, mar wel in woorde met dezelfde strekking. Niet alle tien petiejen in de raod van Epe heb de verkenner uut Aarem de deur ewezen. Ze bint op 't gemeentetehuus al een wèèk doende umme uut te zuken welke drieje liever niet kontekruper van Apeldoorne wilt wèèn. Mar daor hef 't Meneertien mien al de weg in ewezen. Ik bin d'r niej nao welke eisen de raod van Epe temee an de opvolger van Van der Hoeve geet stellen. 't Volkslied wordt in elk geval "Wie Vaossens bloed deur d'adren vloeit." Blif Epe achter met de P in. De P in 't midden bedoel ik.

De politiek zol een veurbeeld mutten nemmen an 't toerisme. Dat zet Heerde, Hattem en Epe op de kaart, wat zeg ik, op éne kaart. Een wandelkaart. Mar ik bin bange dat daor de politiek niet wakker van lig. Die zal zeggen: laot mar lopen….Oh ja, Heerde dut de honde an de ketten, Epe löt ze lös lopen en dan vraog ie d'r umme de gebeten hond te wèèn….Ze wâârk nog wel samen in ene kooi. Misschiens een steugie de gemeenteraoden daor opsluten. Lammert Niesing as rechtscheiter. Met zo'n schaop op vief poten kump 't dan vaste wel ree. De Vriestaat Renderklippen löt zich niet inlieven, 't is mar dat ule 't weet. GAIT.