Gait van deRenderklippen

't College van ach en wee in Epe trek de melk op. Niet umgekeerd ophalen, mar umgekeerd met 't veurnemen um dat in te voeren. De olderenbonden, wijk- en buurtverenigingen kunt reddingsacties in 't butengebied opschorten. Gien rollator races meer umme 't vuulnis van de senioren op tied op de goeje plekke te kriegen. Umgekeerd, mars! Zeg noe nog is een keer dat 't college niet luusteren wil. Nao een klein jaor, zalen vol protesten en een bonke schrieverieje hadden ze 't zo mar deur dat 't volk veur 't afschaffen van de grieze container niks vulen. Knelis van bie mien naos meent dat ze noe 't college ophaalt, mar die hef wel een heel ampàtte nieje lijn van denken.

Noe de piloten in Uune en een stuk van Vaossen op de vlucht bint, umme 't zo mar is te zeggen, loop ze daorr ok de wondertasse mis waor a-j van speulgoed töt boeken en van textiel töt elektries in kunt stoppen. Mar d'r kump een herkansing. De piloten vlieg niet langer aover Uune en Vaossen; ze doet temee heel Epe an. Iederene mag zeggen hoe of ze van de troep of wilt. 't Schèèlt mar ene letter: Epe is an een tas force bezig umme de olde pruttel in goeje banen te leiden. Mar in één opzicht mut ik bee en wee gelieke geven: Epe is de grootste smeerkees binnen de Stedendriehoek. Löt een preuze afval achter waor a-j met de polsstok niet aover hen kunt springen. As daor gien verandering in kump dan grip de hogere overheid in en is niet Leiden mar Epe in last. In de stad zol dat umgekeerde ophalen wel zo hier en daor een succes wèèn. Tja, dank oe de koekoek. Daor steet op loopofstand in elke straote een ondergrondse container.

Wule zit d'r mooi mee. Veurasnog allenig mar vuul in de huud en daormee los ie 't probleem niet op. Misschiens een comité van wieze mannen die zich d'r aover buug. Mar ik denke dan eerder an wieze vrouwluu, die vake bèter prakties kunt denken. Ik geve dan Merie as kandidaat op. Mudde wule noe Epe de zak geven? Ja kom op zeg. Dan gaot wule nog vàdder terug in de tied. Krieg de honden en de katten weer vrie spel en wordt 't aoveral een zeugien. Krieg alle heufde mar is in ene zak? Ik wense wetholder Jan Aalbers starkte toe. Hee is nog nauwelijks bie ekomen van de bomen an de Heerderweg en de kiosk bie de Hertenkamp. En noe dit weer an de fietse. Gelukkig is Epe niet plat zak. 't Mag een paar stuver kosten umme de oplössing te vinden. De carnavalsverenigings bint d'r al mee doende.

D'r kump een Eper versie op ,,Zak is effen deur." Heerde hef weer een nieje burgemeester. Inez Pijnenburg mut toch een goeje indruk achter hebben elaoten anders hadden ze niet nao Fred de Graaf weer een vrouw an esteld. Wel ene van een andere kleur, waordeur Wolbert d'r denk ik ok goed mee kan lèven. In elk geval is 't daor noe meer in evenwicht met de mans- en vrouwluu in 't college. As ik 't allemaole goed begrepen hebbe dan hef de nieje Commissaris van de Koningin niet zo'n hang nao samenvoeging van gemeenten en zit de gemeente Hepe nog lange niet an de grepe. Luu, 't huukien is naogenog vol.

Ik groet ule. Maak d'r een mooie wèke van. GAIT.