Gait van deRenderklippen

't Was klap op klap veur de baord Vinke. 't Is algemeen bekend dat hee een bonke favorieten hef in de voetballerieje en WHC uut Wezep is niet de minsten daorvan. Zelfs as ze veur de bèker tegen een club mut die een stuk lèger speult vlug hee daor op af. Dat vliegen mu-j in de gedachten hollen. Kottens mossen de Wezepers naor Z.A.C. Met de punties d'r tussen. Wezep speult drie klassen hoger, mar 't worden een gifbèker die ze töt 't leste fluitsignaal van de man in 't zwàtte pak mossen lèèg drinken. De pienalties worden deur de blauwvingers bèter eneumen en dus lag WHC d'r uut. Heb ik mien daorveur zo mutten haosten hef de baord edacht.

Die jug op zaoterdag en zundag van 't ene veld nao 't ander en dan bedient hee ok nog drie lokale umroepen tegelieke. Ik wete niet waor as hee disse keer vandan kwam, mar 't gas zal d'r flink op hebben elègen. ,,Wat een klongels", zei hee nog veurdat hee in zien autogien stappen op weg nao de volgende gruune weie. 't Verwarkingsproces hef een dag of wat eduurd. Net toen hee 't weer zon bettien van zich of had eschud dienen de posbode um de tweede klap toe. Een brief met de bekende kleur die Vinke kent as gien ander en die bie um veurdat hee 'm lös maken de kleur al van de wangen ofhalen. Wat hee las dee-j 'm de aosem stokken in de kèèl. Een boete van tweehonderdenveertig euro. Mar weurumme dan? Umdat hee te hard had ereeejen? Nee, dat niet. Effies de fokke d'r bie op zetten. ,,Deur 't rood? Bi-j noe toch helemaole besukerd? Ik stoppe al veur oranje. Nog is goed kieken dan." En toen hee in al zien opwinding de hele bosschap van justitie begreep was 't 'm ok helder wanneer dat vergriep zich had ofespeud. Op de dag dat WHC uuit de bèker worden eknikkerd. Wat zeg ik, kort veur anvang van die wedstried. Ik volge de baord. ,,Onmeugelijk. Ik hebbe op weg naor Zwolle nargens veur hoeven te stoppen. Gien rood en gien oranje." 't Knuffeltien van 't Meneertien van de Krante maken 't d'r niet bèter op met een opmarking aover haosti ge spoed. ,,Deerne, ik zweer oe dat ik gien oranje heb ezien laot staon rood." Met de opmarking dat hee dan wel alderkeizers hard mos hebben ereden deur niks te zien kreeg de baord weer teveule kleur. 't Zit 'm ok niet mee. Kottens heb ze 'm in Nijmegen een alderkeizerse deuk in de auto ereden. Dat was bienao een NEC-slag. Mar die brief van de posbode za-k mar zeggen was dat naogenog wel. Mar as ik d'r zo aover naodenke….

Vinke hef niet veule op met Oranje en dan schiet ie al gauw in de richting van rood. In elk geval had hee daor zo kort veur de Kerst gien schik mee. Verliezen van Z.A.C. is al drie neer niks; d'r ok nog tweehonderdenveertig euro an kwiet raken nog veule minder. Wat um betreft haalt de punties d'r mar tussen uut: gewoon ZAC in plaatse van Z.A.C. En die hef d'r een concurrent bie van de Olde Wisselseweg….Mar zeg dat astoeblieve niet tegen de baord. En al helemaole niet dat hee iets meer acht mut geven op Oranje. Onder de kasdenne kump hee misschiens töt 't inzicht dat d'r meer op disse wereld is dan 't getramp tegen een balle. Dat maak een mense balsturig. Mensen, fijne feesdagen en een goed uutende.

De groetenisse vanuut de Vriestaat Renderklippen. GAIT.