Gait van deRenderklippen

Som hei-j in 't lèven een peerdemiddel neudig umme dát veur mekare te kriegen wa-j graag wilt. An de opperfloppers van de Hoge Weerdschoele in Epe ku-j dat wel aover laoten. Ze lèèf daor op de hoek bie de voetbal, de hockey en de atletiek vredig samen onder één dak met de W.G. van der Hulstschoele. Mar tegen de tied van Sunterklaos dan brik d'r een gezonde competitie uut. Doet ze d'r van alles an umme de andacht te trekken. Veureg jaor, naodat ik begrepen hebbe, waren ze bie Van der Hulst umme 't zo mar is te zeggen iets eerder wakker en stunnen de vente van de Hoge Weerd zich te vergapen. Dat mos noe anders. Mar hoe? De olderraod of wat daor veur deur mut gaon hef zich de kop gek eprakkezeerd. 't Mos wel betamelijk blieven anders loop ie 't risico dat de olde bisschop zeg: zo-de-mijter-op.

In ene keer scheut 't ze in de gedachten. Amerigo. 't Beroemde peerd van de Sint, nao de schole toe halen umme daor al in een vrog stadium zien indrukken achter te laoten. Daor zollen ze bie van der Hulst van opkieken! Ule zult 't vaste niet vàdder vertellen umme de kleinties onder ons in de waan te laoten, mar de oldercommissie zelf mos d'r mee gangs. Creatieve geesten genog en veur de rest konnen ze zich achter een pot met verf verschulen. Ze bint d'r een heel poossien mee gangs ewes en as ik dat liege dan doe ik dat in (dissse) commissie…'t Risseltaot moch d'r wèzen. 't Was 't gesprek van de dag veur de kinder in de onderbouw. Hoe dat peerd binnen was ekomen. Een mirakel! Een paar dage veur de komst van Sint en Pieten mos de boel weer netties worden emaak. Effies de peerdehoeven vot halen. Mar dat zat ze niet zo glad. 't Zweit lekken ze van de kop of bie 't wrieven en boenen, mar 't spul wol d'r niet of. Ze kregen 't al met mekare an de stok aover de anschaf van 't spul.

Op de deksel mut hebben estaon "Honderd jaor gegarandeerd" mar dat heb die klongels aover 't heuf ezien. Die honderd jaor is allenig van toepassing veur Sint en Amerigo, heb ze misschiens edacht. Nao ik mien heb laoten vertellen hadden ze 't vel van de kniejen nao dagenlang geploeter. 't Mos en zol d'r of veurdat Sunterklaos op schole kwam, want anders stun d'r wat te gebeuren. Ie kunt wel lollig willen wèèn, mar op disse manier krieg ie de klad d'r in zal ik oe vertellen. De Sint moch best denken dat alles nog goed in de verf zat, mar d'r met de peerdepeuties gekleurd op staon was toch wel 't andere ende. Hoe zukke wieze luu op zon maniere 't peerd achter de wagen kunt spannen, daor verbaas ik mien aover. Uuteindelijk is de aksie nog goed uut de varf ekomen, mar dat ging dus zeker niet vanzelf. Hoe Gait daor noe weer weet van hef?

't Netwerk van spionnen wordt steeds hechter mu-j mar denken. En pattie luu bint blie dat ze noe niet bie de Hoge Weerd in funktie bint, dat kan ik ule wel verklappen. Zelf bin ik d'r nao alle strapatsen in tweeduzendenachttiene ok goed of ekomen. Mar goed dat disse column nog niet in 't Spaans umme ezet is.

Luu, in 't niemandsland tussen Sunterklaos en de Kerstman groet ik ule vanuut de Vriestaat Renderklippen.

GAIT.