Gait van deRenderklippen

Of ik een soeze bin, zoas Merie met stelligheid beweert, is veur mien as zeer partijdig personage, an grote twiefel onderhevig. De umstandigheden van de kwestie waoran zee 't hierveur benuumde predicaat hecht, speult een grote rolle. 't Was veurege wèke een dag of wat alderkeizers zacht weer. Ule weet wel, van die dage die zich dit jaor vaker andient, tegen alle natuurlijke wetmatigheid in. Uutgelèzen dage umme de kuierlatten de gang te laoten gaon. En wat is d'r dan mooier as een wandeling aover de Renderklippen, met of zonder hond. In dit geval zonder Bouffon, want die was met Annegien mee nao Apeldoorne. Merie had vanzelf de neudige opmarkings veuraf. Zo en zo late weer thuus wèèn, de wandelschoene an en de goeje stappers onder de kapstok en veural de pette op, want 't weer kan zo umslaon. Ze kon mien wat. Met tegen de achttien graoden en een zunnegien an 't firmament, krieg ie Gaitman niet de pette op de knar. Hoe a-j 't ok doet, ie komp altied wel bie de schaopskooi in de buurte. Daor kwam ik herder Lammert Niessing integen. Een praotien aover koetjes en kalfjes, mar in dit geval veural aover schaopen. De lammertied is ewes, mar Lammerttied is d'r 't hele jaor deur. Dan kom ie vanzelf op de politiek terecht. De schaopskooi it van twee wallegies, die van Epe en Heerde. Ie kunt vandaag de dag bèter sprèken aover een wal en een sloot, gelet op 't grote verschil in pegels waor as beide gemeenten aover beschikt. Mar ik heb wel begrepen dat dankzij René de Vries en Jan Stenvert, umme mar is wat te numen, de schaopskudde nikst tekot kump. Die beiden zit in 't presidium van de kooi. Tjoo, ajuus en weer vàdder. Allesbehalve petweer! Ik had 't nog niet bedacht of 't noodlot sleug toe. Vlot achter mekare, van links en rechts, drie eikels op de kop en niet van die kleinties ok. En kan ule vertellen dat zoiets an kump. Met de hande an 't heuf weer op huus an. Lammert die mien zo zag sjouwen had metene zien commentaar klaor. ,,A-j neudig mutten Gait heb ik hier nog wel ruumte veur een noodstop." Ik kon nog wel zeggen dat as dat 't geval zol wèèn ik de hande wel ââns anders zol hebben ehollen en maken um deelgenoot van wat mien was overkomen. En dat leiden metene weer töt een schamper van zien kante. ,,Ie meug blie wèèn dat hier Hollandse eikels staot Gait, want met die Amerikaansen waar ie een stuk slechter of ewes. Daor steet de druk van Trump op. Dan ha-j de pette met de schoenlèpel op mutten zetten." 't Stuk wieter op huus an was een gang nao Canossa. Merie halen eur gram. Ie kunt oe veurstellen dat ze van mien eigenwieze gedrag toch al gien hoge pet op had. Wat ik te heuren krege was riepe veur hulen met de pette op. Ik hiele mien mar veur dat hier de regering van de pet 't woord töt mien richten. Mar umme in de beeldspraak te blieven: op disse mooie dag had ik met de Renderklippen
niks an de pet. Die bulties van ellende en dat op eteld een bonke kopzeerte. Ik mag blie wèèn dat de communicatie met 't Witte Huus niet veule veurstelt anders had d'r daor nog ene Trumpettert dat d'r in Nederland een eikel rond lup. Wat mien an geet niet iets umme lange aover deur te bomen. De groetenisse van een manskeerl met een grimas.

Is getekend: GAIT.