Gait van deRenderklippen

Ie heb d'r gien vergrootglas veur neudig umme Heerde as dé zörggemeente van Nederland te beschouwen. Financieel op twee dubbelties nao an de grond en zörginstellingen umme de vingers bie of te likken. Somtieds komp die dinge samen. Dat was veurege wèke 't geval bie 't hoogste punt van de niejbouwlocatie Hofje Wendakker, ze-k mar de opvolger van De Wendhorst. Um bie die laatste name te blieven: van hieruut hef zich de verpleegkunde aover de noordoost Veluwe verspreid. Das niet wat zol dat.

De Wendhorst mag dan tegen de grond wèèn egaon, wat d´r veur in de plaatse kump is niet misselijk. Helemaole ofestemp op wat de hulpbehoevende mens in disse tied neudig hef. ;'t Modarnste uut 't niejste umme 't zo mar is te zeggen. Bestuurder Laurent de Vries glunderen van oor töt oor. Hee zei op de grond dat d'r alles an wordt edaon umme energiezunig met 't nieje gebouw umme te springen. Op de grond, want effies later sprak hee de verzamelde menigte van hoog boaven 't bouwblok toe. Laurent had as openingsningshandeling ekeuzen umme de luch in te gaon en de wetholders Jan Berkhof en Yasemin Cegerek eneug umme samen met um de bak in te duken. 't College hef daor denk ik nog een steugien bie nao mutten denken, want met zon tekort op de begroting ku-j de bak in gaon ok op een heel andere maniereu utleggen. 't Was fiesterig op de grond en toen de beide wetholders op zich lieten wachten sleug de paniek een bettien toe. Ze waren nog an 't klassineren op 't gemeentetehuus. Naodat ze mien verteld heb is de nood zo hoge dat ok 't college gien eurocent uut mag geven as 't niet beslis mut. En dus bint ze 't d'r niet eens eworden of ze wel of niet de auto mochen gaon. Mar umdat ze beide van buten komp en gien fietse onder de konte hadden zol 't op lopen uut mutten drèèjen. Dat was net ietsies te slim en dus kwamen ze met een kwartier vertraging toch onder 't blauwbekkende volk umme gelieke de bak in te gaon.

Mar ule begrip dat 't niet de bajus is want die kent Heerde niet meer. Veur Jan Berkhof un hele opgave want die hef hoogtevrees. De bak zwiemelen ok nog en niet zo zunig ok. 't Is mien dudelijk eworden dat De Vries met disse actie de gemeente tegemoet wol komen. Heel hoog van baoven kon Jan 't hele Heerder dar oftasten umme te zien of d'r nog wat geld op straote lag. Yasemin hielp 'm daorbie, want twee ziet meer as ene. Ze bint weer veilig op de grond an ekomen. Annegien zeg dat ze begrip weurumme Heerde op zwart zaod zit. ,,Ze zet daor in elk jaorgetiede de blumegies buten va." Dat is een deurdenkertien. Van welke kante a-j Heerd ok binnen komp, ie vuult oe met de bebloemde entrees hastik welkom. Nee, dat hef meer te doen met de OZB en dat steet veur Onbenullig Zwaore Belasting. In een pasbericht schreef de gemeente dat ze dattigduzend aover holt. Mar a-j iets vadder lazen dan stun daor dat ze samen met de inwoners nog een kleine drie miljoen bie mekare mut harken umme lieke te blieven. Dus altied 't hele bericht lèzen mensen anders lig ie met hele verkeerde gedachten onder de wol. Ik krupe gauw achter de gebreide broek. 't Is d'r de tied van 't jaor nao.

Holt de kegels d'r onder en ontvank de groetenisse van GAIT.