Gait van deRenderklippen

Dat Arend in driedelig pak zich thuus vulen as een vis in 't water, nee, alles behalve dat. Met de hondjesslag hef hee zich nao de kante toe eworsteld. 't Mannegien had disse märgen de wind niet bepaald in de zeilen. En zien maot Henk-veur-twee-uur al èvenmin. Ik zal ule helpen umme dit te begriepen. Henk -van-de-kapper had 'm een zeilboot an eschaf. Niet zo'n hele besten, een Friese lark waorvan de zeilen d'r bie hingen as de oren van een zieke olifant. Nee, 't is dat de motor nog wel ansloeg, anders had hee 't dink net zo goed an de kante kunnen laoten liggen. Mar met dat hee de motor anslingeren begun d'r ok op één of andere maniere water in de veurplech te gaon staon en was 't hozen veur Henkie. Hee had veur 't gevaarte ook niet veule betaald, dus klagen was d'r niet bie. En 't gaf zien hobbie vissen meer dan een zettien. Disse keer nao de hank um daor zien geluk te zuken. Dat boot zichzelf al an. Aan de kante stun Arend, in driedelig pak, zien dobbertien uut te gooien. Henk kennen um van heel in de varte.

Of hee mee moch umme op een bètere plekke te hengelen. Daor had Henk gien muuite mee, want hozen en vissen tegelieke vargen nogal wat. Niet dat hee wat dat angeet veule had an Arend, want die wol zien zundagse pak niet besmeren. Henk hef 'm mar niet evraog weurumme hee zo deftig in de kleren ging vissen. Elk mens heft recht op zien eigen gewoonte en ule weet dat onze Lieve Heer een bonke vremde kosgangers an boord hef. Ze praoten af dat ze de vangst eerlijk zollen delen. Dat was makkelijker ezegd dan edaon. Want al wat ze vingen was één snoek. Dat was wel een besten, van dik zeuventig centimeter. Henk sleug 'm an zien aas met drie haokies. 't Vulen niet zo bes an, want de snoek deurmidden doen was gien optie. Daor had onze Lieve Heer een oplössing veur. Ene die beide petiejen verrassen. Bie 't anleggen waarschuwen Henk Arend dat hee an de zietkante van de lark af mos, want veurin de boot was 't spekglad. Die trök zich daor niks van an, misschiens umme gauw an de kante te springen en d'r dan met de snoek vandeur te gaon. Dat pakken kats anders uut. Dewiel dat Henk de boel oprumen heuren hee een plons en al wat hee zeg was een hoed in 't water. Arend was as een snoek za-k mar zeggen in de plomp evallen.

De echte snoek zat in 't iezeren schepnet an de boot vaste. Henk hef de natte man thuus ofeleverd, niet ewacht op wat dat daor teweeg bracht, en is terug ejakkerd nao de boot en de snoek, die noe helemaole veur um was. Hee bellen Anneke op met de vraoge alles in gereedheid te brengen veur een vorstelijk maoltien. Dat liep effies anders. Bie de duuk van Arend was ok 't schepnet lös eraak en met snoek en al verdwenen. Henk hef 'm op weg nao huus twee zolten an eschaf. Ie hadden de ogen van Anneke mutten zien toen die uut 't papier kwamen in plaatse van die ommundig grote snoek. De lark hef ok gien lang lèven ehad. 't Nieje zeil passen egees niet, de motor sputteren tegen, net as Anneke die de kwaliteiten van de visboer hoger inschatten.
Geef eur is ongeliek. Ze trek d'r noe saampies met de fietse op uut. Daormee heb ze wind iets meer in de zeilen.

De groetenisse van disse kante. GAIT.