Gait van deRenderklippen

Ziende doof en heurende blind. Zo ku-j mien ellende van de afgelopen wèke wel numen. Merie had weer is zo'n buuje van ongeduld. Eur zuster was jaorig en daor mossen wule met donders geweld nao toe. , A-j drieven wilt gao-j mar nao 't kanaal", zei ik nog, mar ondertussen was 't toch haosten in de mâântied. Och lieve mensen en dan zu-j 't net zien dat oe alles tegen zit. Waor had ik de brille neer eleg. De aovend teveurten nog op de neuze en in ene keer onvindbaar. 't Is toch niet te geleuven dat die Fokke ok al verstoppertien kan speulen. Ik heb in alle hoeken en gaten ekeken, mar de loerglazen niet kunnen vinden. Ik wil toegeven dat ik daor niet tegen kan. En dat worden nog an ejaag deur de vrouwe die elke keer op 't horloge keek en d'r ok nog bie zuchten. Eers ng mar effies nao 't toilet, want ophollen töt an Apeldoorne was vanzelf niet anbevelenswaardig. Met dat ik de brille horizontaal liet wàrken gillen Merie van onder an de trappe waor ik toch bleve. Ik worden hellig, gooien de ene arm die niks te doen had kin de luch en…….zag nog net hoe 't linker oorapperaat in de toiletpot ten onder ging. Die had ik d'r met een beweging waor een vendelzwaaier nao ieverig op zol kunnen worden van achter de oren ofewâârk.

Tja, dan stao-uj toch echt veur aap umdat andere woord, wat in disse umstandigheden de situatie bèter weer gif, mar niet in de mond te nemmen. Op visite nao mien schoonzuster, ik had d'r gien oren meer nao. Met knikkende kniejen de trappe of en Merie de onheilstijding deur geven. Ie kent dat wel: lelijke höbel van een kèèl, hölterige Klaos, wat denk ie dat ons dat geet kosten. Met oe kump een mense in 't armenhuus terechte. Ik wol nog zeggen dat die d'r al een eeuw of wat niet meer bint, mar dat heb ik mar veur mien ehollen. Ze gunk nog effies zo deur, stellen vaste dat met een soezebol van een kèèl as die van eur niks te beginnen was, maken daor 't passende gebaar bie en liet zich met eur volle gewicht op de banke vallen. Ik heuren krak. Een akeluk geluud. Dat konnen de botten van Merie wèèn, mar dat pakken anders uut. Reumatiek löt zich anders heuren.

En de reactie van mien bètere helfte wees daor ok allerminst op. Ze veren terugge zo gauw as de lèèftied dat toe lut, greep nao 't kleed op de banke en….halen daor de res van wat veur de tied een brille was onder vandan. Tja, ik wisse 't metene weer. Onder de does vandan ekomen, wat water aover de glazen, ofvègen met 't kleed aover de banke en d'r steil niet meer bie stil estaon. Een van de poten van de brille had een anval edaon op de billen van Merie. Ik maken 't nog slimmer deur te zeggen dat ze d'r gien dokter bie kon halen, want wie mossen al schrapen umme de kosten veur een niej oor apperaat én een nieje brille bie mekare te kriegen. De bille en de brille heb mien ered. Pogingen van eur umme de stoffer te pakken en mien d'r mee nao de oren te smieten mislukken deur de pien van de bril an de bil. Mensen mensen, hoe older hoe gekker ze-k ze wel is en dat heb ik dan mar weer is bewezen. Noe ik wat minder de auto gebruke en wat vaker de fietse hef dat met bezunigen te maken. 't Mut toch uut de lengte of de breedte.

Vanaf de breedtegraod Renderklippen groetenisse van GAIT.