Gait van deRenderklippen

Bennie en Trees bint d'r met de kar-mar-an op uut ewes. 't Zal ze nog lange heugen. 't Is nog mar een wèke geleden dat ze 't dink in de stalling heb ezet enze snak noe alweer nao de volgende vakantie. Gien wonder trouwens. Maonden lang keken ze z'r nao uut. Nao dat plekkien in de Ardèche, waor ze 't oge op hadden laoten vallen. As 't ware tegen de Gorges an eplak. Dat bint onmundig diepe kloven. Ze meug de luu die daor krampeert teveurten wel testen op slaopwandelen, want a-j daor 's nachts een keer met oezelf op de loop gaot lig ie zo honderden meters diepe in de kloof. Bennie had alles töt in de punties veurbereid.

't Grote genieten begun dus al vrog in 't veurjaor. De drie kleine vente mochen meepraoten. 't Materiaal nog is goed nao laoten kieken en dat blif bie um niet bepark töt 't oppompenn van de bande. De veurtente kreeg een ekstra beurte. Daor wi-j al die dage toch lakker onder kunnen zitten en al helemaole in de barende zunne. De rit d'r nao toe verliep veurspoedig. Trees had zich uut esloof umme de reis te bekotten met trummelties vol zuutigjheid en hàttigheid. De vente achterin vermaken zich met spannende strips. Zelfs 't oponthold in Parijs kon de stemming niet drukken. De plekke op de camping was nao de zin. Ruumte genog en een uutzicht um de vingers bie of te lekken. Ze keken zo de Gorges in. De aosem zol oe in de kèèl blieven stèken, zo geweldig. ,,Noe nem ik eerst een biertje en dan gaoww de tente opzetten", zei Bennie. Mar op 't zelfde monument dat 'm de leste slok deur de sloeke ging slieren 't bange veurgevuul mee nao binnen. De tente…..de tente……Waor had hee dat ding toch vot estop? Trees had al ezegd dat 't eur verbazen hoeveule ruumte ze aover hadden. Ze had nog extra veurraod mee kunnen nemmen. Och lieve mensen. 't Drama trad al gauw in alle unvang nao veurten. Die tente lag op de zolder in ´t Hinkel. Daor stao-j dan met oe goeje gedrag. Een telefoontien nao ome Jan die op ´t huus passen met de vraoge umme zo gauw meugelijk die tente op te sturen. Dat was makkelijker ezegd dan edaon.

Vindt mar is een deuze die groot genog is umme zon gevaarte in te stoppen. Jan kreeg ´t te lange leste veur mekare. Hee hef de tente de zegen mee geven en de man die de deuze in ontvangst nam evraog d'r haos mee te maken. Die knikken van ja, mar dat had niks te betekenen, want hee zit hele dag met ´t dikste deel van de rugge op de stoel. Elke keer weer bellen Bennie waor ´t dink bleef. Heite…heite daor, niet umme te harden. Pas nao tien dagen was ´t ding op de plekke. Op de middag veurdat ´t noodweer in de Ardèche uut brak. Net op tied konnen ze de boel inladen, de tente d´r inproppen en maken dat ze weg kwamen. De hele camping spulen de kloof in. De zinnigheid umme veur de päar dagen die nog resten ââns anders an te leggen was helemaole weg.

Ze bint op één tour an nao de Veluwe terug ekacheld. ,,Wie bint d'r gelukkig nog", zei Trees. In Frankriek haddren ze nog een paar forellen evangen, mar wieter veur de res vingen ze wat de tente betref allenig bot.

Merie rup veur de koffie dus ik slute gauw dit stukkien of met de groetenisse. GAIT.