Gait van de Renderklippen

A-j't mien vraog kunt gemeenten een bonke geld in kas hollen as ze op zuuk bint nao een nieje burgemeester. Wat ik d'r ok aover heuren in Heerde en wat ik noe weer uut Oldebroek verneme: ze wilt een eerste klas verbinder. Nou, zet dan een oproep in 't blad van de EHBO of 't Rooie Kruus en ie krieg d'r zo een zwikkien die zich an meldt. Merie schuddekop. ,,Gait, Gait, dat bint kort verband vriewilligers", zeg zee. Net as of een burgervader of moeder an 't pluus vaste zit. As die âânt anders meer kunt verdienen maak die 'm ok weer uut de voete. Net zio slim vanzelf as bie de voetbal. Nem noe Jaap Stam van PEC. Die is nog op zuuk nao zien eigen kantoortien en smeert 'm al weer nao Rotterdam. Nee, in die kotte tied vanzelf nog niet met PEC besmet…

In plaatse dat ze in Zwolle noe een stamholder binnen halen dit stampòttien. Ik hebbe veurege wèke de krant drie keer bie de kop epak en mien de ogen uut ewreven. Las ik ´t goed ? Epe, dat an één toer deur een lange vinger maak nao de buren, umdat 't d'r zo hastik goedkoop wonen is, heurt töt de gemeenten die d'r 't meeste baovenop doet in heel Gelderland. De grootste stijgers tegenaover de grootste hijgers. Dat bint gemeenten as Heerde die eur de haok uut de konte loop umme rond te komen. Hoe ze-k ze dat ok weer: Wa-j met de mond belijdt en met de daod bestrijdt! Oldebroek is de grote uutzundering in disse kontreien. Daor daalt de woonlasten. Nee, daor ma-j niet uut concluderen dat de nieje burgemeester dus op veurhand al niet veule mag kosten. Dat hef daor niks mee te maken. Wel met de afvalstoffen en rioolheffing. Ze lèès dunk mien bie de Vereniging Eigen Huis, die de cijferties op taofel hef elegd, met grote andach disse krante, want daor hef de leste tied via 't Meneertien nogal wat in estaon aover 't gemàttel met 't afval. En kennelijk wâârk dat gelieke al deur in de woonlasten. 't Is niet te haopen dat 'dr nog weer een tweede pilot aover hen vlug want dan wordt Epe koploper van de provincie. Mar Merie druk mien met de neuze op 't krantenbericht. ,,Kiek Gait, 't mag dan an disse kante van de Renderklippen wel flink stijgen, ie betaalt nog altied mar 679,27 euro per inwoner tegen een paar meter vàdderop 827,50. Dat is 't tarief van Heerde. 't Hoogste in disse buurte." Tja, en dan mut Gaitman daor 't zwiegen toe doen. 't Is mar net op welke knoppe van de computer a-j druk en waor a-j de naodruk op lek. As ik 't woord knop heure drèèjt mien de mage zich umme. Iets kan bluuien in de knop en ie kunt ook iets nao de knoppen helpen. En dat is wat mien met dit huuksien is aoverkomen. Ik hadde 't verhaaltien al klaor toen Merie 'koffie' riep vanuut de keuken. Dat liet ik mien gien twee keer zeggen. Eers nog effies de computer ofzetten, want de stroomrèkening lup deur a-j an de koffie zitten en daormee wol ik niet op de koffie komen. Wie 't kleine niet eert….

Mar bie terugkeer in mien kantoortien kwam ik d'r achter dat ik wel degelijk op de koffie was ekomen. 't Stuksien gien naam egeven: kats weg, vot. 't Mag gien naam hebben, mos de vrouwe nog leuk wèèn. A-j dus van mening bint dat alles wel wat scheef deur mekare lup hei-j helemaole geliek.

GAIT.