Gait van de Renderklippen

De luu die rond 't plein an de Kapelstraote in Epe woont bint onwies riepe, mar kottens toch effies hastik gruun. Mar dan letterlijk te verstaon. Zo kot tegen de jaorwisseling an keken ze in de mâântied vremp uut de ogen. De een veur de ander zag dat zien of eur autogien gruun van kleur was eworden. De witten, de rooien, de zwàtten en gaot zo mar deur. Van baoven wel te verstaon. Alle daken hastik gruun. 't Is niet zo vremp dat ze al gauw met ene gestrekte vinger nao buurman Jan wezen. Die is de wetholder veur de petieje die Gruun en ok nog links hoog in 't vaandel hef staon. Mar nao enig naodenken mossen ze de vinger tegelieke met de gedachten weer intrekken. Um de eenvoudige reden dat de auto van Jan zelf ok zo gruun as gres was eworden. Hee is met zien portefeuille bie de gemeente toch al vake de gebeten hond en dit ging toch buten de parken. Hee hef een bonke verstand onder de mutse, is een kei as 't umme biologie geet en een standvastig männegien die niet zo gauw van kleur verschut, ok al geet 't umme de kleur gruun die 'm op zich wel past. Tja, daor staoj dan met de hele buurte.

Opvallend wel dat een hele kladde buren daor op 't punt steet van verhuzen. Daormee kan 't verschiensel toch niet worden verklaord. Ene die zich d'r gruun en gèèl an argert? Mar dat kon ook weer worden eschrap, want de kleur gèèl was niet vertegenwoordigd op de daken van de karregies. 't Worden in geuren en kleuren vàdder verteld, ku-j oe veurstellen. Zo kwam 't ok op de Renderklippen terechte. Een dag of wat later worden 't raodsel opelös. Stun 't sein op gruun zo-k haoste zeggen.

't Had niks met politiek en dus ok niet met de wetholder en Gruun Links te maken. Pattie buurluu kwamen ongemâârk töt de oplössing. Ze stunnen te klassineren aover Jan die 't met de Heerderweg , de kiosk en weet ik wat meer al flink veur de kiezen krig. Bie 't onmenselijke of as ik burgervader Hans van der Hoeve mag geleuven. ,,Ie hoef op um niet nao ieverig te wèèn", zei de ene buur. ,,Ja mar hoge bomen vank een hoop wind", zei de ander. Waorop de eerste weer: kiek is die kante uut. Hee wees op een boom die d'r baovenuut stak. En dat was de boosdoener. Die liet de autoos in de Kapelstraote gruun uut slaon. Ik numen 't al: Van der Hoeve hef op de niejjaorsreceptie flink uut ehaald nao de a-sociale media, die töt dichte bie huus bestuurders van alles en nog wat anwrief zonder daor bewies veur an te dragen. Wat dat angeet stao ik vierkant achter 'm. D'r blif immers genog aover waor a-j wel op een fatsoenlijke manier
vraogtekens bie kunt zetten. Meer inspraak van de burger, 'm betrekken bie van alles en nog wat mar tegelieke niet open staon veur de kritiek op twee kommissievergaderings én een zitting van de Bezwaorenkommissie op een en dezelfde aovend.

Volgens Merie gao ik hiermee absoluut niet aover de grenzen van 't onfatsoenlijke hen. En as 't noe met een fatsoenlijke zitplaatse veur 't Meneertien bie de raodsvergaderings ok nog een keer veur mekare kump hef die niks meer umme aover te klagen. Wie weet völt dit temee ok nog onder de verbeterslag van 't college. Dan geet de vlagge uut an de Ramastraote. Veul heil en zegen van GAIT.