Gait van de Renderklippen

Toeristen komp niet neer vanzelf op de Veluwe an. In de veurege eeuw kraopen ze met veule plezier tussen de kippen in 't hok, mar dat is verleden tied. En bie de bètere accommodatie beheurt ok een bèter welkom, ze-k mar lös van de Veluwse hölterigheid. De mensen netties op eur gemak stellen en vertellen wat ze allemaole bie ons opp de hei en in de bos kunt belèven. De rakkers van de natuur, die noe ene keer IVN heet, gaot daor in veur. Die spiekert de luu van pensjons, hotels en de èèt- en drinkgelegenheden bie en maak ze gastheren van 't landschap. 't Is wat Gelderland angeet in Heerde begunnen bie Jan Nitrauw en konsjotten. Dat is aover eslagen nao Epe en daor bint d'r ok weer viefentwintig van op cursus ewes. 't Meneertien worden enueg umme met 't hele spul in een busse de ofsluutende ekskursie mee te maken. Dat hef hee eweten. De busse was d'r allene mar umme de deelnemers van Epe nao Vaossen en terug te brengen. Wieter veur de res sjouwen, sjouwen dat wi-j niet weten. Ze hadden halverwège de dag de tonge al op 't dàdde knoopsgat hangen. Ze zult bie de IVN wel edacht hebben: dan weet uule ook is wat de toeristen allemaole mutten doen umme weer fit op vieftien hoog terugge te komen. Ik zal uule vertellen, zei 't Meneenrtien, dat ik ommenullig veule opesteuken hebbe op 't landgoed Tongeren en in de Kroondomein. Fokko Andringa mag dan bie oranje ofehaak wèèn, bie gruun, dat wil zeggen inde gruune jasse van 't Geldersch Landschap, vuult hee zich as een vis in 't water. 't Meneertien had de verkeerde schoene an toe ze in de buurte van 't Wisselse vèèn deur 't gebied hen kuieren. Mar die vulen nao zoveule kilometer toch al nattigheid. De luu uut de sektor hadden veule schik. Ze hadden op die cursus al wel eleerd da-j 't samen mutten doen. Dat had die keerl van de Sprengen en Bèken, die onderweggens instappen, nog niet zo begrepen. Hee stun baoven 't waterrad, vertellen hoe old Vaassen en 't kasteel wel niet was, wees met de vinger de andere kante uut en zei dat 't darpien daor d'r iets van zol kunnen leren. Ze heb 'm onderweggens mar uut de busse ezet, want dat is noe net wat 't niet mut wèèn. 't Geluud van veur de komste van Nieje Lijn za-k mar zeggen. Wat is de Veluwe toch mooi. 't Deerntien van de IVN hiel 't tempo hoge. Ze had twere massepanten mee eneumen. Dat was neudig zei zee. En nao lang andringen weet ik noe weurumme. Bie 't of sluuten in Heerde kwamen ze met ene minder bie de eindstreep. Die maken onderweggens een noodstop. Ze missen 'm pas toen ze 'm nao kwamen brengen. Dus worden 't in Epe behalve vertellen evural ok tellen. Veurdat de historiese busse in gang worden ezet want op de Veluwe telt vandage de dag iederene mee. De bosschap is goed an ekomen: op de heugte wèèn wat zich umme de deure ofspeult en wa-j d'r allemaole kunt zien. En dan komp wuule temee weer met stip op de eerste plaatse van vakantiebestemmings te staon. Hef de Noordzeekuste gien kans meer. De Veluwe betekent dan 't zelfde as IVN: Instapplaatse Veur Nederland! D'r bint plekken waor gien hond wil wèèn, mar bie ons op de Klippen bint ze d'r bie toeren allemaole gelieke. Groetenisse van GAIT.