Gait van de Renderklippen

't Meneertien was van de wèke wa-j nuump van 't padje. En niet zo zunig ok. Hee mos veur de Oranjekrante die d'r in Heerde an zit te komen an 't klassieneren met Geert-Jan Bijsterbosch en raken umme in de beeldspraak te blieven 't spoor buten 't bos biester. Nog wel in de bebouwde komme van 't Heerder darp. Een uur lang hef hee lopen dwalen umme op de goeje plekke te raken. 't Knuffeltien had 'm nog zo ewaasrschouwd. Nemp de Tom Tom mee. Ze weet hoe vake of hee in de wilde boekweit zit as 't umme een adressien geet. Mar hee mos daor umme lachen. ,,Mens, waor maak ie oe in vredesnaam druk umme. In Heerde kent iederene mekare en ik hebbe in 't tillefoonboek ekeken. Gewoon nao de Acacialane. Recht toe recht an. Wie dut mien wat."

Mar op de Acacialane op nummer viefenvieftig gien Geert Jan. Hee drèèjen 't auoraampien lös en vreug an iemand op straote waor Biesterbosch dan wel wonen. Veur an de straote woont een Biesterbosch zei die. Daor was niks mis mee. Alleniog ging 't niet um de man van de Oranjekrante. En toen kwam 't mannegien d'r achter dat hee toch mar effies minder nonchalant had mutten wèèn. Van de ene nao de andere Biesterbosch. A-j hellig begint te worden dan raak ie 't stuur aover oezelf kwiet. Gelukkig niet aover zien auto. Of hee niet bie de sportschole mos wèèn. Nee, die is alderkeizers sportstief, haalt met zien pupillen vake oranje, mar dan bint 't linties die ze wint met judo. Op 't leste zetten hee de auto midden op de straote. Is een huus binnen esjacherd en hef an de vrouwe die de deur lös dee-j esmeek umme steun te verlenen. Die hef 'm de tillefoon egeven en nao huus laoten bellen. 't Knuffeltien maken de taktiese blunder deur 'm op zien soezerigheid te wiezen. Daor worden 't niet bèter van zo a-j kunt begriepen.

In elk geval hef hee zich alle straoten laoten numen waor as in Heerde Bijsterboschen neer bint estreken en ik kan oe vertellen dat 't een aovendvullend programma is. Uuteindelijk was d'r iemand die 'm vertellen dat Geert-Jan weer thuus was. ,,Man holt d'r aover op. Ik bin drie keer wèzen kieken. Hee is niet thuus", schamperen 't Meneertien. Mar weeer thuus hef meer dan ene betekenis. Geert-Jan is weer in zien olderlijk huus etrökken. Kottens verhuus. Dat steet een straote of wat vàdderop an de Jasmijnstraote. Met die beide straoten kon onze man uut de Ramabuurte zien nonchaslance niet langer verbloemen. 't Bestuurslid is mar niet gelieke aover de Oranjekrant begunnen. Hee zag met één oge wel dat zien bezoek een opgewonden indruk maken en bood um koffie an. Nao wat rommelen in de keuken zei hee dat ze toch mar eers mossen beginnen. Toe ze klaor waren met 't Oranjeconcert hef hee de Senseo nog mar weer is toe espreuken veur dat ze an de lampionoptocht begunnen. Mar wat d'r ok uut 't dink kwam: gien koffie. Nao de knoppen of drukken op de vekeerde knoppen…. Daor zaten dan twee onthande mansluu. Ene al de hele aovend baoven zien theewater en de ander die bie zichzelf op de koffie kwam. 't Geet umme oranje mar a-j de koppen van de beide mansluu die aomd zagen was 't meer rood dat regeren. Terug nao de rus van de Renderklippen.

Groetenisse. GAIT.