Gait van de Renderklippen

Uune hef een kei van een kàrke, mar ok keien veur de kàrke en dan bint niet van die kleinties ok. Wat wil ik daor mee? Nou eigenlijk niks anders as ze stille laoten liggen en d'r niet aover hen kalebateren. Mar hoe kom ik hier op. Nou dat zal ik ule vertellen. 't Meneertien hef zien nieje buukien aover de Klementbrugge in een kraom meugen verpatsen op 't Koefeest. Teuni Nooteboom en konsjotten hadden 'm een schiere plekke anebeuden. Wat denk ie: pal veur de kàrke. Met gelieke achter 't tentzeil de grootste van de keien. En daor belèven 't schrievertien mooie momenten.

Um dat de kolde wat optrök op die règenachtige dag gunk hee op die keie staon en stak metene in Uune baoven Uune uut. Dat wil zeggen: baoven de luu met deursnee lengte. Hee kon tegen Uune blieven op kieken en tegelieke op Uune neer zien. Een sensatie veur 't mannegien die bie 't uutdelen van lengte achteran hef estaon en noe in ene keer met de grootsten mee kon doen. En toen gebeuren 't. Een jong stellegien kwamp veur de kraome schulen. 't Deerntien keek eur man van tegen de twee meter is an, richten toen de blik op 't Meneertien en zei tegen eur partner: ie bint vandage toch nog de grootsten niet op 't Koefeest. 't Meneertien glunderen en hoewel hee op de keie stun te wankelen bleef hee staon umme zich de finest moments - dat bint de mooiste ogenblikken heb ik mien laoten vertellen - niet of te laoten nemen.

Wat een volk en wat een nattigheid. De eersten die de kraome van 't Deurgeefluuk, de stichting van 't boek za-k mar zeggen, binnen stappen was dominee Mijnheer. Die schaffen zich 't Drama Klementbrug an. Roel van Nek, de andere medewaarker an 't boek, bedanken de dominee en die menen dat Roel 'm veurstellen. ,,Mijnheer'', zei die netties. ,Ja, dank u wel meneer", zei Roel die niet van de plaatselijke toestand in Uune op de heugte is. De stichting was nog wel een bettien benauwd, want ze stunnen op de parkeerplaatse van de EHBO. Mar toen ze zagen dat de Telegraaf op de parkeerplekke van Mijnheer was gaon staon klaoren 't op. De domienee maken aoveral een praotien en die geestelijke biestand worden op pries esteld op disse verrrègende donderdag. Ondanks 't bar slechte weer was d'r een smak volk. Dat dee-j 't bestuur van 't Koefeest vaste goed. Dat zat met een beste bonke scha an de weies deur al die nattigheid.

Mar een traditie laoten verrègenen, daor is meer veur neudig. Zeker in Uune waor de mensen scholder an scholder staot.'t Völt mien op dat in disse umgeving onmundig veule van de grond kump en dan heb ik 't niet aover onkruud. Nee, ik bedoele an evenementen. Somtieds een bettien veuele tegelieke en daor zol wat meer aoverleg niet verkeerd wèèn. Van de gemeenteraod heb ze deurgaons gien concurrentie, want de interesse in de politiek wördt d'r niet groter op. Misschiens dat 't mâân in Epe een keer volle bak is in de Silo van Bibo. Daor heb ze 't dan aover begraven in de natuur op de Woldberg in Emst. Niet iederene denk daor 't zelfde aover.

De groetenisse van de hele kraom met inbegrip van GAIT.