Ene Wolf vot; drie terugge

De tied van vrogger is niet die van noe. Dat mag ie ok niet naos mekare hollen. Mar toch mut ik daor nog wel is an denken as ik zie hoe as ze noe bie de voetbal de vente in de watten lek. Ze kunt zelf as ze van 't veld gaot de jas al niet meer ankriegen. Daor is d'r dan ene veur in ehuurd die niet weet hoe gauw as hee dat stuk tekstiel um de rugge van de speulder mut leggen. 't Zal wel niet zo lange meer duren of ze trek ze ok de schoene nog an en uut. Hoe kom ik daor op. Dat hef te maken met een stuk in disse krante wat 't Meneertien aover Michael Wolf hef eschreven. Die kump niet meer uut veur ''t eerste van Heerde. Hee is met PEC besmeurd zek ze, mar ik wachte nien d'r wel veur umme disse hendige verdediger zwart te maken.

't Meneertien zei tegen een anhanger van gèèl en zwart zak mar zeggen dat ze 't wel flink zol spieten. Mar die was d'r gauw mee klaor: ene Wolf weg en d'r metene al drie veur terugge……Ik mosse d'r effied bie anodenken, want de vente van Michael bint zo old nog niet. Mar toen begreep ik 't. Hee bedoelen welpen die de beide volwassen wolven bie ons in de bos groot brenk. Vossen vrèèt zich vol an de kippen, noe de wolven de jonge herten. Ik denke dat d'r nog iets ander achter zit. De wolven op de Veluwe, dat trek een bonke volk an. Pättie luu vraog zich af of ze 't in de kop knip, mar dan weet ze nog niet waor as ze achter de scharmen mee bezig bint. In 't kader van de Veluwe op Één laot ze tijgers hier op an komen. De gemeente die de bos d'r veur open stelt en uut is op 't meeste vakantievolk mag ze lös laoten.

Jongens jongens, 't mut niet gekker worden. Anderen heb achter de scharmen de buizerds etraind umme de Veluwenaren die tegen vliegtugen uut Lelystad bint in de kuif te pikken. Dat met die vliegtugen geet niet meer deur. Temee hoef ie niet meer buten d Veluwe op vakantie want dan lup d'r hier net zo veule wild as in Azië en umstreken. Ok een maniere umme Cora van Nieuwenhuzen töt andere gedachten te brengen. De vliegmaatschappieen trek zich al terug. Die ziet gien kans umme de toestellen op tied daor in de polder an de grond te kriegen. Ze speult d'r niet mee. As ik daor an denke kom ik vanzelf van speulen op brood. Merie had de stoete op, sturen mien op 't darp an en op de terugweg lag ik wel degelijk (denk an brood) op de snufferd. Bie de bakker in 't steegien stun een auto an de kante, ik wol d'r met de fietse langs heer mar zon oelewapper die van de andere kante kwam duwen zien karregien d'r tussen. ,,Ik kon er niet door", zei de man die mien met de stoete op de grond zag spàttelen. ,,Nee ik ok niet", heb ik um laoten weten. En wat ik wieter veur de res nog tegen um ezegd heb heurt niet thuus in een fatsoenlijke krante as Veluweland.

Ik wete dat 't een heel gedoe is umme oe riebewies te laoten verlengen, mar as ik disse brokkenpiloot in gedachten holle dan geet 't nog veus te vlot. Merie kik aover de scholder mee eb zeg: Gait, dat haal ie d'r uut, ik mudde mijn pampiertien volgende maond laoten verlengen en op die manier verklongel ie 't veur mien. Waorvan akte. Mensen, smeert oe goed in. GAIT