Een grote hèkel an Epe

De zuupotters in Oldebroek wreven zich in de ogen. Ze waren bie een voetbalwedstried tussen VIOS uut Vaossen en een club Batavieren uut de polder. 't Ging umme een positie hoger op de ledder van 't amateurvoetbal. Ie kunt oe veurstellen dat 't d'r dan flink an toe kan gaon. 't Viel bes mee. 't Gekke was eigenlijk dat de meeste andacht uut ging nao een spandoek achter de kool van de Bataven. D'r hing ok mar één zon doek en dat was niet veule veur disse belangrieke match. Mar de tekst op 't dundoek was opvallend. Wat zeg ik: spectaculair. Die tekst had helemaole niks met de voetbal te maken. Gien "Hup VIOS" of '' Laot de polder de blanke billen zien", nee, niks van dat alles. Ie wilt 't niet geleuven, mar d'r stun lèvensgroot op: 110 procent anti Epe!!! 't Meneertien die d'r  veur de krante op de tribune zat kreeg een hele bonke vraogen. Waor of dat op sloeg. De Vaossenaren speulen toch tegen de polder en niet tegen de buren? En wat dan nog? ,,Ik stun daor met de mond vol tande", zegt 't Meneertien.

De vente die dat doek heb emaak waren nog minderjaorig, vertellen hee mien. Die heb dus ietsies van huus uut mee ekregen ma-j veronderstellen. Mar niet 't beste wa-j bedenken kunt. Daor waor de verholdingen tussen beide darpen op veule fronten biekleurt is dit 'vertoon' een stevige stap terug in de tied. De hèkel an de buren was op dat moment veur de jeugd veule belangrieker dan waor 't disse middag um ging. Dan schut mien iets te binnen. Volgend jaor viefenzeuventig jaor geleden dat de gemeente Epe worden bevrijd. Volgens de een op zeuventien en volgens andere ingewijden op negentien april. Dat wordt temee evierd. En 't mooiste van alles is dat de vier darpen van de gemeente goed samenwâârk.

Hoewel disse bevrijding heel veule maolen belangrieker is dan degene waor ik noe op hamere, is d'r toch in de geest van 't jeugdige volk van noe ok nog heel wat te bevrijden. Lös kommen van haat die nââns op slut. 't Spandoek hef een helfte van de wedstried aoverlèèf. D'r worden meer aover dat laken epraot dan aover de wedstried. In de rus hef 't bestuur van VIOS 't dink weg laoten halen. Dat hef ofstand eneumen van disse provocatie en stun net as 't Meneertien te schuddekoppen.. Ik denke dat de vente die hierveur verantwoordelijk bint de tied bèter hadden kunnen besteden an 't anmoedigen van eur ploeggien. Dat had 't hard neudig tegen de profs uut de polder. De nederlaag van VIOS vulen minder slim an as de nederlaag die de goeje verholdings tussen twee darpen disse middag worden toe ediend. D'r völt in disse wereld nog veule te bevrijden ok dicht bie de deure.

Ik liepe d'r nog wat aover te prakkedenken toen ik de deur van de auto in 't slot gooien. Op zich niet zo slim, mar wel a-j de sleutels d'r in laot zitten. In dit geval was Merie veur mien de bevrijder. Die hef d'r nog ene in reserve en dat is mar goed ok. Luu, doet d'r kalm met hen en geniet van de zunne. Mar de schoer baoven de Klippen gif an daw 't vandage niet dreug holt. Onze Veluwse grond kan nog bes wat nattigheid gebruken. En de traonen aover 't spandoek bint al weer lange vot. GAIT.