Gait van de Renderklippen

't Blif anmodderen met 't H2O terrein in Hattemerbroek. Hattem, Heerde en Oldebroek zit an de ene kante vaste en heb hulpe neudig, mar dat Aarem zich d'r teveule tegenan geet bemuuien völt ok weer niet beste. En alle petiejen die daor in 't zadel zit bin 't ok een bettien zat. Die wilt van Cornielje en Co weten hoe of 't daor op de Noord Veluwe in mekare stik. Ze krieg die lappe grond met al dat geklongel niet vol. Ik mosse d'r an denken toen ik heuren dat d'r een appèl wordt edaon an alle gemeenten en dus ook die drieje umme hulpe te bieden bie de opvang van vluchtelingen. Ruumte zat bie H2O umme de mensen daor op te vangen. Mar ja, ik wete ok wel dat 't allenig geld kost en daor zit Hattem, Heerde en Oldebroek niet op te wachten. De financiële broek hank ze op de enkels. Nee, dat zal 'm dus niet worden. Ik kriege wel de schamperlach as ik zie hoe de gemeenten zich an alle kanten betrökken vuult en meelèèf met de mensen in nood, ze de minister laot weten dat ze d'r alles an wilt doen, mar naos 't huus van betrokkenheid nog gien knienenhok an ruumte kunt vinden. Opvallend genog dat de gemeente waor de mensen 't dichtste op mekare woont, Attem dus, nog wel kans zut umme de medemens in nood opvang te verlenen. D'r steet tegenaover dat Den Haag de gemeenten wel met van alles en nog wat opzadelt mar d'r gien middelen tegenaover zet. Aover middelen en ruumte espreuken. Ze heb 't Koefeest ok bie de veter. Op 't hele dàrp mag op die dolle donderdag in oktober gien auto meer langs de weg hen staon umme hulpverleners vrieje deurgang te verlenen. Plietsie, gemeente, ambulance en brandweer mut van alle kanten vrie spel hebben. Merie vrug zich af of die allemaole ooit wel tegelieke in Uune bint ewes, mar ja, die hef ook gien politiek inzicht. Ze sluut de boel van alle kanten hermetisch of zodat d'r gien kip of krééj Uune meer in kan. Hoe dat mut met 't volk dat an 't wâârk is en weer nao en van huus mut kunnen komen is nog onbekend. Daor buug ze noe in de hoogste kringen de kop aover. Ik heb al heuren zeggen dat die een gruune kaarte krieg. Mar a-j de mensen d'r aover bezig heurt dan heb ze liever een rooie kaarte umme die weer an degenen uut te delen die 't bedacht hebt. Dus kiek uut temee in oktober en probeer niet slimmer te waen. Piene met parkeren is niet zo slim as pien in de pottemenee die dag. Ze slep oe de auto zo weg en daor hank een alderkeizerse boete an vaste. Ok al kump dr gien auto Uune binnen, 't gebrom is nog nooit zo slim ewes. Ze doet vanzelf ook allenig dat wat Den Haag hef bedach en as ik 't van Wilco van Essen goed begrepen hebbe dan lup Epe nog een ende achteran met dit soort dinge. D'r wordt in elk geval een heel bataljon plietsie en Bezundere Opsporings Ambtenaren in ezet met kerosine honde umme te ruken of d'r niet âânt toch nog een karregien steet. Laot oe d'r niet van weerhollen umme 't Koefeest te bezuken want ze heb d'r alderkeizers veule energie in estop umme 't veur iederene antrekkelijk te maken. Een entien lopen loont zich en daor ku-j 't niet veur laoten lopen. Luu, ik hebbe de ruumte vol en wens uule namens de Vriestaat Renderkjlippen een mooiue wèke toe. GAIT