Gait van de Renderklippen

De Franse madam zeg zoveule as dat 't niet neudig was ewes.'t Is toch gewoon een speulse hond. Een een trouw beessien ok. Jaja, ze had is mutten weten. Met Merie, Annegien en Bouffon nao Zuud Frankriek ewes. Bes nao't zin ehad: lakker in de zunne, elke määrn Franse keze en op 't terras een glaaassien Pernod. Daor ku'-j honderd jaor mee worden. Bouffon, de Franse buldog van Annegien, was niet meer van de zee weg te branden. Thuus lup e met een wiede baoge umme elke plasse water hen. Bang dat e zien peuties nat krig. Mar van 't eerste monument of deuk hee zo de Middellandse zee in. Annegien had um un zwemvest an atrökken, want ie weten 't ,mar nooit. 't Was egees niet neudig. Ze was nog effies bange dat e zo recht toe recht an op Afrika an zol zwemmen. Dat gebeuren niet, want ze hef flink de wind d'r onder, riep um terug en dat was genog. Ik mosse mee umme zo of en toe een stok in de branding te smieten. Die brach Bouffon in de tied da-j 't d'r aover heb al weer terug. Nee, ze meug mien d'r mee straffen zal ik uule vertellen. Bouffon ok dus. 't Water was wel wat an de kiolde kante. Dat zekers. Ze kregen mien d'r met gien tien peerde in. Veur een hond zit dat kennelijk wat anders? Kennelijk? Hee mag 't woord niet heuren, want in de kennel hef hee al lang genog elègen. Nao een steugien op 't terras wat edrunken. Een Franse madam had 't niet zo op honde begrepen. Die trok lelijke gezichten in de richting van de buldog. Mar ze had niet deur dat een Franse buldog ok Frans kan verstaon en niet zon bettien ok. Naodat ze veur de dàdde keer de rebbel lös had etrökken aover zon stinkdier kwam de reactie. Bouffon drèèjen zich umme en liet een gaswolk lös waor ze de helft van 't zuuden van Frankriek mee bewusteloos hadden kunnen maken. De madam worden in elk geval bevestigde in eur mening dat hier een stinkhond lag. Ze gunk moppperend en schuddekoppend van 't terras of. Bouffon at 't leste stukkien keze op dat van de taofel was evallen en vleug weer op de zee of. Dat 't kolde water Bouffon ok niet helemaole onberoerd leek worden al gauw dudelijk. Hee mos akuut de blaoze leug maken. Plekke genog daor an 't strand. Weurumme as hee noe net op een handdoek van een andere Franse madam an mos stiefelen en daor een straol aover mos doen zal alleenig een buldog wel begriepen. Wuule zaten d'r mooi mee. Annegien as de gesmeerde weerlicht nao een kiosk en die hef daor een badhanddoek eköf metde vuurtoorne van Grau d'Agde d'r op. Wuule heb die Franse dame op ewach. Annegien sprik vloeiend Frans en ik kan 't deur die strapatsen van 't Meneertien in de Tour de France ok heel aorig. Wuule heb d'r van emaak dat Bouffon op eur hand doek was gaon liggen. Een mense mut zichzelf noe okm weert niet gelieke in de zeik zetten, of niet dan? ,,Geef die handdoek mar hier, dan krie-j van ons een niejen'', zei Annegien. Ze greep de lappe tekstiel meten op veurdat de eigenaresse d'r an kon zitten. Met veule muuite accepteren zee 't . Zal wel een heel verhaal ofesteuken hebben aover die zindelijke pensjoengasten. En op die maniere is veurkomen dat d'r een paar Ollanders in een kwaoje reuk kwammen te staon. Goed gaon. GAIT.