Gait van de Renderklippen

Wat ene letter en één cijfertien teweeg kunt brengen! Veurege wèke kwam ik daor nog weer is achter. In Heerde maak wetholder Gerrit van Dijk zich druk umme de gemeentebossen. Ze zek dat hee die in de portefeuille hef mar Gerrit mag dan wel in de VVD huushollen, zó een grote knippe, dat wil d'r bie mien toch niet in. Nee, alle gekheid op een stökkien. Hee hef zich veur eneumen umme de bos d'r weer gaaf uut te laoten zien, een plekke waor as een mense graag nao toe wil en veural ok een locatie waor een mense kan komen. De paden open en de lanen in zak mar zeggen. Hee hef goeje ofspraken emaak wat 't wildbeheer an geet. Gien ,Schiet mar an, ome Jan', mar net zoveule varkens en reeën as een bos verdragen kan. Dat heb ze netties uuterèkend., Zoveule zwijnen, zoveule reeën en ok precies hoeveule edelherten. Noe kump et. Veurig jaor mochen ze vief edelherten ofschieten. Dan blif 't allemaole binnen de pàrken. En wat lèès ik dan in de samenvatting: dat ze viefentwintig procent van dat ofschot heb ehaald. A-j rèkenen kunt, laot dat dan effies töt uule deurdringen. Ze heb dus een en een kwart edelhert weg ewâârk. Hè? Hoe mut ik mien dat dan veurstellen? Lup d'r noe een dier met drie poten deur de Heerder bossen? Dit kwàttien is bie mien nog niet evallen. Misschien is d'r veur dit soort diers een andere rèkenmethode. Ik denke dat ik daor temee van de wetholder wel een antwoord op zal kriegen en dan help ik uule ok uut de droom. Temee ku'j in elk geval in Heerde weer hastik goed deur de bomen 't bos zien. En a-j per ongeluk een edelhert ontwaart met een poot tekort, laot 't dan weten. Ik denke dat ze ons ongewild, dat zeker, bie disse poot heb eneumen. Dat is dus 't merkwaardige verhaal van die cijfertien uut Heerde. In Epe stuiten ik in een lievig stuk aover de zörg op een zinne die mien de wenkbrauwen ok dichte bie de pette brach. Hoe 't d'r precies stun steet mien niet meer de gees, mar wel zoiets van: Voorst dut ok mee as gemeente" en dan nog een riedel d'r achter an. Noe begriep ik ok, zeg 't Meneertien, weurumme Van der Hoeve en Co de kante van de Iesselt op kiek. A-j een bondgenoot as Voorst heb die zo mar een pongel geld an Epe ofdraag. Dank oe de Koekoek en das niet de kampioen zwembad van Nederland. Merie dragen de oplössing an. ,,Och Gait, dat is toch een vergissing jonge. Daor had Voorts mutten staon….." Tja, één lettertien op de verkeerde plekke en ie heb 't schaop an 't drieten. Mar goed dat ze oe niet geliekie an ene letter ophank, zeg ;'t Meneertien, want dan kon ik de kop elke wèke wel drie keer in de strop stèken. Oh ja en dan nog iets aover slimmigheid. Ik wete niet of wereldkampioen veldrieden Hennie Stamsnijder uut die plaatse d'r achter zit, mar zien Enter trek 't meeste profijt van computer en internet. Ie slaot 't elke dag wel duuzend keer an. As Hennie daor wel de hand in hef dan mut ik de pette diepe of nemen. Dat is een reclame waor niks en niemand tegenan kan. Ik hebbe mien huukien weer vol en wens uule 't allerbeste veur de kommende wèke. De groetenisse van Annegien, Merie, de buldog Bouffon en GAIT.