Gait van de Renderklippen

Gien geld dan ok zien uutzending mutten ze bie Radio 794 hebben edacht. Burgemeester Inez Pijnenburg wol bie de begrotingsraod de luusteraars welkom heten mar ze worden net teveurten ewaarschuwd dat de verbinding met de studio was verbreuken. Deurdat de gemeenten Epe en Heerde een mooie slok van 't geld dat ze uut Den Haag veur de lokale umroep ontvank an andere dinge besteedt, mut de umroep de enties an mekare knuppen. Letterlijk en figuurlijk disse middag. Ze kunt de studio niet professioneel op orde laoten brengen en dus mut dat dage lang met vriewilligers. En dan schut d'r wel is 'n draotien lös mu-j mar denken. Ok ene nao 't olde gemeentehuus. In de raod zit zeuven leden die 't geluud uut de regio hoog in 't vaan heb staon. Tiene holt 't liever op Hilversum. Epe en Heerde heurt bie de verkeerde helfte van de Nederlandse gemeenten die 't kennelijk niet zo op de lokale berichtgeving heb begrepen. Ie mutten 't volk ok niet wiezer maken as 't al is .'t Was in Heerde een begroting van aroma en euroma. 't Zal toch niet waor wean dat ze Waopmvelde weer een kladde arbeidsplaaten of nemp? Misschiens dat ze verkas nao 't H2O terrein, dan is daor eindelijk ok een keer wat loos. Mar met hier iets weg en daor iets bie schiet ie ok niet veule op, hein? Halverwège kregen de raodsleden een krokettien. Ze heb vaste elegd wie as d'r twee in de sloeke lieten glieren. Die krieg temee een naorèkening en Brussel teunt ons an hoe hoge dat op kan lopen. De nieje Klaorbèke is officieel lös egaon. Ze hadden d'r veule wâârek van emaak. Veur effies uut de zorg mu'j mar denken. Dat hadden ze de Staatssecretaris wel egunhd mar die mos van Rutte in Den Haag blieven. Gelle moch 't van um aover nemen., Den Haag let zelf o kun bettien op de kleintjes want de man woont sinds meert in Epe en dus waren d'r gien reiskosten. De duofietse waorop hee met vrouw Witteveen an kwamp trappen liep gesmeerder as de ketten van de zorg in Den Haag kan ik uule wel vertellen. Veur wetholder Dick van Norel was 't een heel ampàtte gebeurtenis. Hee was in 't verleden directeur van 't andere zorgcentrum in Epe. Dick hef slaopeloze nachten ekend umdat 't met de niejbouw daor niet veur mekare kwamp. De straote heb ze al helemaole um eleg, veule tied in de veurbereidings estop en elke keer de daotum waorop 't zol beginnen uut esteld. De leste daotum die ik eheurd hebbe is Sint Juttemis….En laot noe Dick in zien nieje functie de ere egund worden umme een bome te planten. 't Viel mien welop, zie 't Meneertien, dat um dat karwei niet allenig worden toevertrouwd. Harry Franke, zien olde maot van De Klaorbèke, mos ok an de schuppe en ze hadden d'r Geertje Goudbeek bie tussen ezet umme 't evenwicht te bewaren. Hee denk dat ze zo in de smiezen wollen hollen dat Dick d'r niet met de struke vandeur ging umme 't ding bie de Boskamp in de grond te poaten. Mar dat is vanzelf niet gebeurd. Dick is d'r noe veur de hele zorg en as d'r ene is die daor van of weet is hee 't wel. Ik bin d'r wel bange veur dat hee nog lange in 't gemeentetehuus mut blieven zitten veurdat hee bie De Boskamp ok zon bome mag planten. Ontvank de groetenisse van GAIT.