Gait van de Renderklippen

Merie hank de vlag uut as temee de voetbal in Frankriek achter de rugge is. Ze is mien geloer veur de tilleviezie meer dan beu en betreurt de veuruutgang van de techniek die 't meugelijk maak umme ok töt in de uuthoeken van de Renderklippen glashelder binnen te halen wat d'r in Frankriek speult. Niet allenig ik kreeg de volle laoge. Dat geldt ok veur Bouffon, de Franse bulldog van Annegien. Deaoraover zo metene meer. De vrouwe kan 't zich niet indenken dat ik warm lope veur getramp tegen de balle. Tegenaover mien interesse steet eur nuchtere ofkeer.

Nemp noe de wedstried van Engeland tegen Wales. ´t Was spannend, mar de goals bleven lange uut. ,,Kiek noe is Merie. D'r zit gien schot in", mut ik ezegd hebben.

En de vrouwe had metene 't antwoord klaor.,,Dat kan ok niet Gait. Schotten meug zich niet met die beide buurlande bemuuien." En effies later, toen ik mien liet ontvallen dat d'r een schot in de lucht hing, vreug Merie: ,,Waor dan Gait? Ik zie d'r gien ene´´. 't Worden slimmer bie Iesland tegen Frankriek. Wule kregen geheel onverwacht visite van John Hedderson, Ieslander van huus uut en een maot uut vrogger tieden die tegenwoordig in de Randstad woont. Hee maken een trippien aover de Veluwe en had bedacht dat hee en Mia, zien bètere helfte, bie Gait en Merie an konnen stèken umme nao de voetbal te kieken. Ze bint gien grote liefhebbers, mar toen Iesland 't zon ende schuppen en zelfs Engeland aover de knie leggen, raken ze toch niejsgierig hoe 't tegen de Fransen zol gaon.

't Was hatstikke gezellig. Zowel Merie as ik hadden d'r iemand bie: Mia mut ok niks van voetbal hebben en met John had ik iemand waor ik de gedachten mee kon delen. Merie mag dan niks van dat gedoe mutten weten, ze is wel een goeie gastvrouw en zörgen d'r veur dat d'r wat van onder de kurke op de taofel kwam met ok nog een petie Franse keze. John trok wel een bettien met de neuze, want hee zag d'r misschien wel een ondersteuning van de Franse haanties in.

Wieter veur de res gien kommentaar. Dat kwam wel uut de mand van Bouffon. Veurdat de Fransen gehak van Iesland maken hadden een paar van die Sons, zo heet ze daor allemaole, een paar kansies. Mar daornao liep 't was Iesland betref helermaole de verkeerde kante op. Toen ze gingen schaffen hadden ze de keeper van Iesland, die in 't dagelijkse lèven bie NEC in De Goffert onder de latte steet, al vier keer 't naokieken egeven.

Toen dat veur de vierde keer gebeuren worden John lelijk en zei iets in de geest van rot Fransen. Umme d'r an toe te voegen dat allenig de Franse keze goed smaak. Mar jonges nog an toe. Die was 'm niet egund.

Bie de lelijke woorde aover de Fransen sprong Bouffon uut de mande. As een echte Franse hane deuk hee op 't schötteltien van John en stak de inhold in de sloeke. John wol nog griepen mar kwamp te late. Bouffon gooien met een achterpeutien de struuk in de vaze van de taofel die Merie van Mia had ekregen. Tja en die Franse slag is mien ondergang. Ik zal de halve finale en de finale bie Knelis de buurman mutten bekieken. Goed gaon met mekare. GAIT.