Gait van de Renderklippen

Zo bi-j in demeerderheid en zo stao-j met lège hande. Dat mut sheriff Ben van der Linde hebben edach toen Herman van der Stege zien portefeuille inleveren, naodat Jolanda Pierik dat al eerder had edoan. Beide op goede Waopmveldse gronden,mar 't kump wel hard an a-j een keer twee wetholders uut 't paddendàrp heb tegen mar ene uut Heerde. En die ene, Gerrit van Diek, is de enigen van ach en wee die aover is ebleven halverwège de rit. Komp mien niet an met praoties aover erebaanties en zo, want as wetholder krie-j 't bie vlagen flink veur de klongels. Ik hebbe d'r effies bie nao edach.

't College onder leiding van Inez Pijnenburg hef zich lös emaak van Oldebroek en mut veur juni de boer op in Epe en Hattem umme uut te zuken hoe of ze daor tegenaover samenwâârking staot. A-j 'tmien vraog heb ze een makkie. Nog effies in Hattem op zuuk nao een plaatsvervanger veur Herman en ze heb de drie gemeentes al in één college evangen. Jan Berkhoff uut Epe is immers al inemetseld in 't gezelschap. Dan kunt Epe en Hattem veur goed fatsoen toch niet meer umme Heerde heer? Mar meschiens gaot de gedachten van Ben wel een andere kante uut. Ie hoef niet gek op te kieken a-j temee een Heerder college heb met in plaatse van twee wetholders uut Wapmvelde twee mansluu uut Epe. Want daor loop nog een paar kandidaten vrie rond die 't in zich heb umme die paar jaor in elk geval te aoverbruggen. En tegen die tied hef Ben allange iemand in Waopmvelde evunden die 't aover wil nemen.Misschiens dat hee noe al wel iemand achter de hand hef, want nog een tweede Heerdenaar d'r bie zal u mok niet in dank worden of eneumen. Mar 't geet wel gauw zo in de politiek. Ik hebbe ok nog edacht dat Epe een wetholder aover hef. 't Waren d'r drieje en noe vieve. En a-j dan in de hoek-van-Ben za-k mar zeggen terechte komp, dan lup daor een old Heerdenaar in 't college. Mar ja, die schient in Epe op zien plekke te zitten en an burendiensten zit wel een eindigheid. Mar goed dat Inez in Heerde hef bie etekend, want anders was d'r in disse periode niet ene meer van de olde garde. Verniejen is goed, mar niet zo drastisch en al helemaole niet op disse gronden. Mar wacht 's effies. Zol Hendik uut de Veldsiet niet wat waen? Ze ze-k dat hee dichte bie Herman in de buurte steet en in zien gees kan deur regeren. Merie twiefelt an mien verstand. ,,Wèès noe toch wiezer Gait", zeg zee. Dan wil hee dat elke raodsvergadering in de streektaal wordt ehollen en daor zal gien meerderheid veur wèèn. En denk ok mar niet dat Jennegien um twee jaor of giet staon an Inez. En nog slimmer: as Hendik op ' t pluus geet zitten lig 't verenigingswâârk in Waopmvelde op de konte. Dat kan Johan Horst ok alleent niet an. En dan gif dat weer ampàttigheid met 't Meneertien van de krante die d'rop steet dat Johan bie WZC an de tap blif. Dat schèèlt wat um betref meer dan een slok op een borrel. Laot wule 't mar an Ben aover laoten. Zien speurneuze zal wel een oplössing vinden. Die hef wel veur slimmer recherchewâârk estaon mu-j mar denken. Wie krieg d'r temee wel weet van. Holt de bene d'r onder en maak d'r iets moois van.

De groetennise uut de Vriestaat van GAIT.