Gait van de Renderklippen

De krententstoete lag Veessen zwaor op de mage. ,,Veul belaoven, weinig geven. Dut de gek in vrede leven.'' Ik wete niet of d'r deur sommige krachten in 't veld zo is edacht, mar gek bint ze zeker niet an de Iesselt. Heerde maak zich belachelijk as Citaslow gemeente met toerisme en recreatie in de spits. Denk an 't Transferium dat niet van de grond kwam en noe weer 't Rivierfront dat in de baom dreig te zakken. Ik wete niet wat de raod gisteraomd hef bekokstoof umme 't tij te keren. Wel dat 't met de recreatieve opwaardering van de gemeente wel heel arg Citas slow geet. Met de mond belieden en met de daod bestrieden, dat is eerder an de orde. Wie zich nog veule meer mag schamen is de provincie Gelderland. Die haalt Heerde de wâârkgelegenheid of, zit te klongelen met Berghuuzer en met 't Ennerveld en holt as d'r een keer wat goed emaak kan worden de hande op de knippe. Dan ku-j oe d'r as gemeente wel op veur laoten staon da-j zukke alderkeizerse goeje bande met Aarem heb, de bevolking mârk d'r niks van. Wel Veessen de hoogwatergeul in de mage splitsen, wel vief miljoen in de pocket veur toeristische doelen, mar daorvan 't darpien an de rivier veural niet teveule doen toekomen. As 't effies kan helemaole niks. De wetholder schreeuwt hoge van de daken dat 't allemaole goed kump met 't Rivierfront, hef de filsetaatsies op de bagagedrager liggen. Hee is dan egees nog niet met petiejen rond en de raod mut nog oordelen. Hoe gek ku-j 't maken. 't Financiële water steet de gemeente töt an de lippen. Mar da-s gien reden umme Veessen te laoten verzupen. A-j ziet hoeveule geld d'r is uutetrökken veur kunstgres, dan mag een kunstgreep veur Veessen ok wel wat kosten. 't Is veur te stellen dat ze d'r daor gien (voet)bal van snap. Veessen in Chit en As. Samen Chietas. Ie kunt oezelf een onmundig mooie name op de borstkasse spelden,mar 't geet umme de inhold.

Een vlag op een modderschip brenk weinig an. In een raod waor alle regels aover spreektieden an de leerze wordt elap en mensen net zo vake de rebbel lös meug doen as ze't in de baovenkamer te passe kump, zol gien woorden mar daden bèter passen. En ik hebbe d'r nog een bettien hoape op dat ze gisteraomd een fiasco met 't Rivierfront heb kunnen veurkomen. De wetholder had de vergadering al helemaole niet willen hollen. Die was d'r al klaor mee. Mar dat kan um duur komen te staon, want goeje raod is duur. 't Völt op dat de raod van Heerde de leste tied wat bèter samenwâârk, dat ze 't belang van de burgerieje veurop stelt en de heilige huussies in de bedevaartsoorden laot staon.

Veessen een mooi angezicht waormee de gemeente Heerde veur de draod kan komen. Dan wordt Citas low strong en zult temee hele bulten volk de weg nao de Iesselt weten te vinden. Desnoods met de botte biel van 't Rivierfront een speerpunt maken en dat Gedeputeerde Staten op de borskas zetten. Umme d'r in Aarem een arm an te passen. As 't allemaole goed kump wordt dat de beste 1 aprilbak die d'r in jaoren is op ehoest. Vuult Veessen zich niet langer veur de gek ehollen en bint ze temee wies met 't nieje smoel.

De groetenisse uut de Vriestaat van GAIT.