In de vingers esneeien

Harold Makaske en konsjotten heb zich in de vingers esneeien. Die gingen d'r van uut dat ze in Aarem op 't provinciehuus de streektaal niet machtig bint. Veur in de Grote Kàrke zetten ze de mannenbroeders neer. Niks mis mee. Goed bie stemme mar wel etekend deur de name: Doetmaes. Dat is in Algemeen Beroerd Nederlands: Doe het maar eens. Tja, en as dan bliek dat ze op 't provinciehuus met de decoder de streektaal kunt ontmaskeren dan ku-j verwachten dat ze zo'n uutneudiging umme 't toch mar is te doen niet in de wind slaot. Ik zagge bie alle protesten de zangers ja kinikken en in de hande klappen en toen wissen ze in Aarem helemaole wel hoe late of 't was. Met ons grote talent Manuel Sanguino waren ze wat veurzichtiger. Die lieten ze niet 't Requiem van Mozart speulen al waren ze 't wel Mooi Zat. Alder keizers wat een bonke volk. De plietsie hef volges Makaske de deure dichte edaon umme te veurkomen ze in de kàrke gingen stapelen. ,De kogel is deur de kàrke", zei Daan van Apeldoorne mien bie de uutgang. Dat bedoelen hee vanzelf figuurlijk mar 't had ook mar zo in 't echt kunnen gebeuren. Wat was 't volk hellig in de botten!. Deurumme ok gien Maartensgilde, want dan liepen ze 't risico dat ze de kruusdbaogen kwiet waren eraak en dat ze daormee op de fracties achter de taofel hadden escheuten. Wat een lettertien meer of minder uut kan maken. In 't dagblad stun onder 't petret Top de kaalslag an de Heerderweg. De s van stilte was weg evallen mar dat begriep ik ok wel weer, want 't was allesbehalve stille. Ik liet de name al vallen. Makakse staoken 't spul op. Iederen dacht dat Aad Breedveld 't zol doen, mar die was allenig mar umme 't veurportaal lös te doen. Ze hadden nog tegten Harold ezegd dat hee de leiding an een hogen had mutten toe vertrouwen. Mar bie hoge denk die al gauw an Rozenhof en Eper Veste en naodak mien heb laoten vertellen kan hee daor niet zo bes mee aoverweg….De veurdeure van de kàrke dichte, mar de drèèjdeure stun wied lös. Daor bedienen de raodsleden zich van. Wie bint d'r eigenlijk tegen mar stemp d'r veur. Ik zagge d'r een paar denken: wie bint d'r mooi jaorig mee. En veur Jan de Graaf was 't warkelijk zo. Die vulen zich tekot edaon. Makakse wol um un kaalslag met 't haor bezörgen mar dat was ene keer mar nooit weer heuren ik Jan denken. Nee, de Heerderweg hef gien blad veur de mond eneumen. Achterin de kàrke was nog discussie aover een opmarking van ene uut Aarem die zei: wule kap d'r mee. Mar dan op zien Hooghaarlemmerdieks. Dat bedoelen hee niet met 't besluut vanzelf mar met de bomen. De gedeputeerde die 't veur 't zeggen hef lag op de rug in de zunne in Verweggiestan. Die kan ok mar bèter wat Epe an geet de Bieze pakken. Dat Konnie ok niet laoten heb ze eur ezegd. Bie dit onderwàrp passen een Borsboom bèter mut ze edacht hebben. En die liet zich niet veur 't blad drèèien. Dat wil d'r temee nog hen gaon as ze de biel pak en daormee honderden bomen tegen de vlakte gooit. Krieg wule dan nao de bomvolle kàrke Bijltjesdag nao Eper smaak? 't Is hâârfs, Epe kleurt gruun en gèèl. 't Liek wat dat an geet de àrgernisse van de Heerderweg wel. De politiek verschut hier niet van kleur. De groetenisse van GAIT.