Blotekontengedoe

Reinder en Ria heb 't d'r op ewaog. 't Hiel d'r lange veur. Wellness? Ja jonges, dat kan allemaole wel waen, mar dat blotekontengedoe, dat is niks veur ons. Zo ongeveer. Eur beste maoten, Piet en Petra, zit daor anders in. Die heb enthousiaste verhalen oaver 't warme water dat goed is veur de (k)olde botten. Mar ze kregen Reinder en Ria niet mee. Dus was 't een kwestie van verzin een list Tom Poes. Die beijen bint kot nao mekare jaorig en daor lag de kans. Een cadeaubonne veur twee personen veur een verwendag. Ze hadden veur alle zekerheid ok mar een deuze ruukspul veur eur en een spannend boek veur um in epak, want as 't met die bonnen niet goed uut zol pakken kwam de goeje verstandholding niet onder druk te staon. Reinder en Ria wissen zich gien holding te geven. Mar de bonnen waren niet zo heel lange geldig en dus zat 't onderwâârp ze zogezegd op de huud. Piet en Petra heb ze aover de streep etrökken met 't veurstel umme met zien vieren te gaon. En ze hoeven zich niet helemaole bloot te geven: ule kunt 't badgrei an hollen. Dat gaf de deurslag. Dus met de kriebels in de buuk op 't warme water an. Ze heb zich zelfs laoten aover halen umme an opgieten mee te doen. Dat wil zeggen: umme dat te ondergaon,want 't opgieten zelf dat dut een man met zo'n viefdegraods theedoek waormee hee steet te zwaaien waordeur de lakkere luchies oe kante op komp. Mar heite….heite…'t Zwiet broes oe veur de kop. Reinder was wel een bettien bange dat ze de badmantel niet terugge konnen vinden umdat iederene d'r ene van dezelfde kleur umme de klongels hef hangen. Goed op 't hoek hangen dus. Alles van weerde lao-j in 't kassien binnen, mar dat wa-j neudig heb mut dan mar in de jaszak van de badjas. En daor liep 't uut de reels. Nao 't opgieten wol Reinder de brille uut de jasse halen en….vot was 't ding. Noe is 't niet zo dat hee helemaole niks meer zut zonder de Fokke, mar in 't restaurant liep hee toch mooi met de kop tegen 't glas van de deure. Ze hadden alles of ezöch mar niks evunden. Ja, daor hank een honderd of wat van die jassen en ene had de verkeerden mee eneumen. Nao een uurtien melden de receptie dat d'r een brille evunden was. Een brunen met streepies aover dwars. ,,Van mien", juichen Reinder. Hee begun net een bettien las van kopzeerte te kriegen. In 't restaurant heb ze zich tegoed edaon an drie gangen. A-j toch ene keer gangs bint pas dat d'r goed bie. Ria is gek op vis. Toen zee een keuze mos maken en op de kaarte "Visverrassing" stun was zee d'r gauw klaor mee. Wat veur soorten zol zee allemaole op 't bord kriegen. 't Èten worden an edragen. 't Kloppen helemaole mar ook weer niet, want de bediening hiel een pot in de hande en die had d'r gien ene besteld. ,,Ik heb hier toch als vierde een visverrassing", zei 't mannegien van de bediening. Ja màr, heuren ik ze alle viere zeggen. De verrassing was een pot met…..mosselen, zo ongeveer de enige vis die Ria liever vandage dan määrn terug nao Zeeland zut gaon. Ze hef zich niet laoten kennen, en met ene schelpe een hele bonke van die mosselen nao binnen ewâârk. 't Worden dus wellness met handiap veur Reinder en Ria. Mar ze bint oaver de warmwatervrees heer.

Groetenisse van GAIT.