Gait van deRenderklippen

Daor stao ik dan met een verbrande kop en twee pikzwàtte oren in een weiland in Uune. Albert Oortgiesen van 't CDA had mien uut eneudig umme getuge te wèèn van 't oorverdovende lawaai wat Boeings maak die van Lelystad of disse kante uut komp. Merie moch ok mee. Die wol mien niet laoten gaon zonder oordoppen op. ,,Straks knap oe de trommelvliezen Gait en dan zit ik d'r mee." Volges mien een wat vremde conclusie, want as bie bie mien de oren te hetter en te fletter bint kan zee daor toch gien hinder van hemm? Nee, zukke onzin daor heb ik gien oren nao. Um drie minuten veur vieve zol 't gevaarte aover komen. Mooi niet. Ze heb bie Schiphol kennelijk edach dat ze de boerties is effies flink bie de poot konnen nemmen. 't Worden half zesse, zes uur, half zeuven en zeuven uur. Van Dirk Jan Beumer van 't Uuner Belang, die met de piloot in verbinding stun, heuren ik dat 't oorspronkelijk toestel 't niet meer deed en dat ze mossen wachten tötdat ze een ander toestel uut de hangar konnen kriegen. Tegen zeuven uur kwam d'r een stip an de horizon. Ik zetten mien schrap mar nog veurdat ik Merie een teken kon geven was 't dink ok weer vot. Ik denke dat 't een fluustermachine is ewes want as Merie de rebbel reurt kump d'r meer lawaai uut. Gien mensen die d'r geleuf an hecht dat dit een echte proef is ewes. As ik in bedde ligge en d'r komp vliegtugen op een kilometer of wat hoger aover zetten dan heur ik drie keer zoveule as die middag in Uune bie Zwier van de Weerd in de weie. Mar op de terugweg was 't effies anders. Toen vleug 't dink op de goeje heugte en was 't een stuk onrustiger tussen de koeien. Jan Bibo maken zich teveurten nog zörgen. D'r stun een kantinewagen met een piepe. Hee dach dat 't zo lange duren umdat de piepe te hoog baoven 't dak uut stak en Schiphol daor bezwaor tegen maken. Honderdviefentachtig centimeter. Mar Jan had 't niet goed elèzen. 't Was achttienhonderd meter. Ik hebbe d'r trouwens gien spiet van dat ik daor de middag deur heb ebracht. Albert en 't CDA trakteren op van alles en nog wat. Herman ter Weele bakken alderkeizers lekkere hamburgers en die vergoeden helemaole wat d'r uut Amsterdam bleef stèken. IJsko's, koffie, thee en limonade plus koeken van Loes Loman umme de vingers bie of te lekken. Nee, eerlijk is eerlijk, iederene had de mond vol van de christendemocraten. 't Zol een vluchtig gebeuren wèèn mar 't drèèjen uut op een latertien. Noe heb ik wel begrepen dat met die twee uur vertraging de twee jaor uutstel die de boerties van buten heb bereik weer is e compenseerd. Nee, van dit vliegtuug krig Uune gien opvliegings. Allenig 't toestel zelf was d'r kapot van. Misschiens was d'r met de richtinganwiezer iets an de hand en bint ze van Schiphol aover Spanje en de Pruus weer op ons an komen vliegen. Mar temee, as die Boeings vol vakantievolk elke uur een keer of wat aover komp vliegen, wordt 't anders. Die brenk dan 't vakantievolk vot wat bie ons op de Veluwe weg blif. Compensatie? Vraog dat mar an de Grunnegers. Veul belaoven, weinig geven, dut de gek in vreugde leven. Met al die barsten daor en 't lawaai hier niet umme oe te bescheuren. GAIT.