Gait van deRenderklippen

In de meeste gemeenten staot de nieje colleges van ach en wee in de steigers. In Heerde zal 't van de wèke ok wel zo wiet wèèn. Daor is Dick van Norel an etrökken as formateur. Ze hoef 'm de weg niet te wiezen, want hee hef zien jeugd d'r deur ebracht. Ie wilt niet weten wat allemaole aover de teunbanke geet bie zo'n formatie. Toen de leste Heerder wetholder Gait van Diek an de kante worden ezet vunnen pättie luu dat vanzelfsprèkend. Ze wissen precies hoe 't egaon was. Dick kwamp 't gemeentetehuus binnen, heuren dat d'r nog een wetholder van de VVD in 't college zat en viel van verbazing zowat achteraover. ,,Die petieje in 't college? Dat maak ie mien toch niet wies. Die heb wule in Epe al twaalf jaor an de zielijn ezet.' En vot met Gait. As of Dick dat allemaole in zien eentien beslis. Nee, die maak allenig de balans op, leg zien oor te luuster en trek dan zien conclusie. Dat 't dan op 't zelfde neer kump, ja dat is vanzelf dikke toeval. Ie kunt oe veurstellen dat 't d'r in Heerde nogal veur hölt. 't Ene nao 't andere liek kump uut de kaste.

De nullen achter de ene euro stapelt zich op. Ze heb noe wel drie butenlanders die temee an de knoppen drèèjt, mar wie wat geet doen is de grote vraoge. Dat zit vaste op financiën, daor ku'j vergif op in nemmen. 't Olde college hef een beste pongel met schuld achter mutten laoten. Naodat ik verneumen hebbe wollen ze 't eerst oplòssen met monopolie. Daor bint SG-CU en CDA sinds jaor en dag bedreven in. Mar Bram Horst had d'r gien oren nao.

Een pòttien 'Mens arger oe niet' leek meer veur de hand te liggen. Mar niet elke petieje had èven veule pionnen en dat zol dus een ongeliek gevecht worden. ´t Leste wat tòt mien kwam op de Renderklippen is dat ze d'r noe umme gaot dobbelen.

't Meneertien zag kottens Jan Tuinman bie't college. Hee is de opperflopper van de grootste petieje. Misschiens kwamp hee umme toestemming veur de anschaf van dobbelstenen. Fred de Graaf en wetholder Meijer waren d'r niet, Berkhoff en van Diek wollen d'r niet allenig veur verantwoordleijk wèèn. Van Diek al helemaole niet, want die weet dat a-j een bettien strabant bint alles aover oe hen völt. In elk geval verwach ik dat ze tegen de Pinkster d'r uut zult wèèn. Terug nao Epe en de VVD daor. Die hef via een slimme umweg noe toch an ehaak bie de coalitie. Ze nuump dat 't inzetten van een joker. De fractieleider is veur zichzelf begunnen en die haak noe an bie Scholten en konsjotten, naodat hee d'r vier jaor tegen an hef eschup. Bèter ten halve ekeerd dan ten hele edwaald mut hee edacht hebben en zoiets kan alleent mar een slimme Vos. Temee heb ze aoveral 't zakien rond en kunt ze weer vier jaor vedan. Markink van de provincie hef opdracht umme met de gemeenten Hattem,Heerde en Epe te praoten aover samenwâârken.

,,Nuum mien mar gedupeerde", mut de gedeputeerde ezegd hebben toen Cornielje um veur dat runtien uut eneudig hef. Ik denke niet dat hee gelieke veur een drietrapsraket geet en in eerste instantie een tweetraps geet ofschieten. "Kop van Gelderland? Gien denken an. Wule blief mooi op onszelf", zeg Scholten en die hef 't veur 't zeggen.

Groetenisse van GAIT.