Gait van deRenderklippen

Ie hoef d'r niet gek van op te kieken a-j temee bie de entree van de gemeente Heerde een grote kollektebusse ziet staon. Dat mag wel de grootste melkbusse van 't westelijke halfrond wèèn. Zo in ene keer, late op de aomd veur Koningsdag, löt 't college weten dat ze 't hele jaor tweeduuzendenachttiene gien euorcent meer te besteden heb. Ik heb zelfs begrepen dat Fred de Graaf vanuut Apeldoorne langs 't knaal mut rieden umdat 't een kilometer of wat schèèlt bie as hee de snelweg nemp. En Meier zal wel in een logement mutten gaon, want elke dag zo'n bedrag an reiskosten dat zit d'r vaste ok niet meer in. De nieje kandidaat wetholder van de PvdA mut car poolen met De Graaf dunk mien. Kukies bie de koffie in de raodsvergaderings was toch al niet gebrukelijk, mar temee mu-j zelf de themoskanne mee van huus nemen. En dat is allemaole de schuld van Den Haag a-j 't geleuven mag. Pas op 14 mei is dudelijk hoe groot de pongel an schuld is die de inwoners op de rug krieg te hangen. Ze meug zelf meepraoten aover de oplössing. Dat zal wel wèèn in ene keer dokken of 't uutspreiden aover twaalf maonden. Wat wel heel vremp aover kump is 't monument van 't nao buten brengen as iederene de kop hef hangen nao Koningsdag. De pers moch wetholder Meijer d'r wel op ansprèken mar wie dut zoiets op Koningsdag? A-j 't zo bekiek is 't zo gek ook weer niet dat d'r in heel de gemeente gien mense is die wetholder wil worden? Wie hef d'r noe zinnigheid in umme de kop zelf in de strop te stèken. Zollen ze 't tekort nog wel in zo'n gebouw as De Heerd kunnen hollen? Ie kunt as kleine gemeente de grote broek nan trekken, mar as oe de bretsls ontbrèèk umme de bokse op te hollen dan krie-j dit soort toestanden. Ze heb de toekomstige coalitie al veur 't karregien espannen. Bi-j ntoch klatr mee a-j zo'n erfenis van 't zittende college mee krieg. D'r is heel wat denkwâârk veur neudig umme hier weer uut te komen. Naodat ik begrepen hebbe gaot ze hier heel vere in. Want nog veurdat de brief met de onheilstijding aover 't reuzn tekort was verzunnen hadden ze de eerste euro's al binnen.

De mensen van de bridgeclub konnen de auto niet kwiet bie 't Darpshuus, zetten um op een veilige plekke an de kante van de weg en kregen een beste boete an de klongels. Schoppen troef! Ku-j oe veurstellen dat ze, bridgers of niet, flink van de kaarte raken. Niet de bridgers, mar de politieke liek de weg kwiet. Stel oe veur dat alles wat noe nao buten kump veur de gemeenteraodsverkiezingen bekend was eraak? De consequentie laot ik graag an ule aover. D'r kump niet veule nao buten aover 't nieje college. Ik hebbe heuren vertellen dat ze aover mekare hen tuult in 't verlangen umme financiën veur eur rèkening te nemen. Wule mutten dus nog een steugien wachten veurdat de aap uut de mouwe kump. Ze kiek alle kasten nao of d'r nog lieken lik. Fred de Graaf had 't al aover de Kop van Gelderland met Epe, Hattem en Heerde. Ik denke dat Epe en Hattem de kop niet zo mar samen met Heerde in ene zak stèèk. Wat de zak betref: Sunterklaos zal in Madrid de boel wel bie hollen.

De groetenisse van GAIT.