Gait van deRenderklippen

Goedkoop is duurkoop. Daor bin ik veurege wèke achter ekomen. Via een umweg, en dat ku-j zowel letterlijk als figuurlijk invullen. Merie hef mien d'r al vake veur ewaarschuwd dat ik un bettien teveule de Veluwse eknieperd uut hange. Dat slut niet op mien biedragen an een niej kleedje of een röksien veur eur. Daor bin ik gauw mee klaor. Zee hef gien butensporige wensen en ie mutten somtieds van 't gezichte oflèzen of zee zinnigheid in iets hef. Nee, 't geet umme heel wat anders. Mien jacht op 't goedkoopste tankstation. Daormee bevind ik mien in een grote groep mensen die 't vertik umme dure brandstof in te slaon as 't âânt anders veule goedkoper is. Dat geet niet zo veere as bie de Baord Vinke die d'r veur nao Duitsland jach en die helemaole niet bie bedenk hoe een ende of hee dan veur de goedkope benzine umme rit. Nee, mar ik hebbe al wel een aorig schema in de kop waor as 't op bepaolde dagen goedkoper is dan op andere plekken. Op donderdag nao Vaossen beveurbeeld. Mar umdat ik begin van de wèke nao de parmetaotsie in Oost Souburg was ewes zat ik op woensdag al aorig an de limiet. Merie hef gien groot verstand van auto's, mar zee kan wel de benzinemeter oflèzen. Töt drie keer toe hef ze mien emaand umme te stoppen en gien flauwekul an te halen, zo as zee dat nuump. Mar ik hadde goeje ervarings op Sicilië waor ik op weg nao Palermo met een zo goed as lège tank toch nog bie de luchthaven kwamme. Ie mutten zo'n meter niet geleuven. D'r zit altied rek in. Dus zol ik de donderdag en Vaossen nog wel halen. Woensdagaomp Annegien nog effies nao 't station in Apeldoorne ebrach. Dat was buten mien berèkening mar wat in Sicilië waor is mut ok veur de Veluwe gelden.

Op de terugweg bin ik binnendeur langs 't kanaal egaon en dan zo via de VMI op de Renderklippen an. Ik hadde een mooie CD en zunge mee met 'Heidewietska, veuruit geef gas'. Halverwège 'rfrein, toen ik zelf ok gas wol geven, begun mien karregien te bokken en in 't duuster van de Wiemanstraote voltrök zich de noodstop. Ik nao een boerderiegien in de buurte. Anbellen, op de deur kloppen. Mooi niemand thuus. Bie de VMi was 't lich ok al uut. Dat krie-j a-j eigenwies bint en ok nog is een keer oe mobieltje bie de tilleviezie laot liggen. 't Was baovendien ene van die mooie veurjaorsdagen. 't Zweit broezen mien veur 't heuf. Ik kwamme gien mense tegen tötdat mien op de Brakerweg buurman Knelis achterop kwam. Die hef mien bie de pompe op 't Eper dàrp ofezet en met een blik vol benzine weer netties bie mien auto terug ebrach. Umdat ik ok nog is een keer de knippe in de daagse broek had laoten zitten mos hee mien 't geld veurschieten.

Merie maken nog een opmârking aover files onderweg en zo, mar ik bleve wieter veur de res buten schot nao ik dagge. Mooi niet. Knelis kwamp an de deure met de bonne van de tank. Die voert as penningmeester van de geitenfokvereniging een zunig beleid en wol zien euro's weer terug zien. Ik hebbe van Merie onderuut de zak ekregen en niet zo zunig. Nee, veurtaan gewoon mar tanken as de auto d'r umme vrug. Want mien strategie maak van goedkoop duurkoop.

De groetenisse van de hele kraom met inbegrip van GAIT.