Gait van deRenderklippen

In de zes gemeenten die disse krante bestrik is de nieje raod ekozen. A-j oe stemplicht heb verzaak dan mu-j de waffert dichte hollen a-j 't niet met met de uutslag eens bint. Wat ik eheurd hebbe is dat de uutslagen van 't ene bie 't andere stemlokaal verschillen as de dag bie de nacht. 't Kan niet an de koffie liggen want die krie-j daor niet uut ereik. Ie kunt wel as petieje op de koffie komen, mar ik nemma an da-j 't d'r dan ok nao heb emaak. Van de stemmachine weer gewoon nao 't rooie potlood. Ze ze-k dat 't op uutdrukkelijke wens van de PvdA is gebeurd umdat de kiezers de leste jaoren nogal van kleur bint verschoten. 't Hef niet ehölpen want ze blief an 't verliezen. In Epe van ruum zesduzend nao nog gien duzend stemmen. Dat hef niks van doen met de Nieje Lijn, naodat René de Vries mien hef laoten weten. Die zesduzend hadden ze nog toen iederene al an zien Nieje Lijn was ewend.

Die De Vries is al zo'n kleine dàttig jaor vot van school, mar rèkenen kan hee nog as de besten. Merie vreug mien of ze in Hattem andere potlode heb umdat daor de PvdA juus wins boekt. Mooi niet: daor laot ze zich niet deur landelijke tendensen bie de strot pakken zeg 't Meneertien. En at ze 't daor iets anders bak lig met zo'n alderkeizers mooi broodmuseum veur de hand. Effies weerumme nao Epe : daor was 't een gezellige boel saoms in 't gemeentetehuus. An drank en hàttigheid gien gebrek, töt an krokeggies toe. Wat dat betref verdient ze een Oscar mar die heb ze daor al in huus. Gruun Links boeken ok terreinwinst. Die heb met de veurman een Klavertje Vier in huus ehaald. Nieje Lijn uut Vaossen trök in Epe een streep deur de rèkening.

Alle bomen van de Heerderweg en 't gemàttel met meule en verkeer in Vaossen hef gien uutwâârking ehad. Ik heb mien laoten vertellen dat Scholten temee een veurstel geet doen umme 't gemeentetehuus nao Vaossen te verplaatsen. 't Pas bie 't zwembad en de sporthal van de Koekoek. Die bint toch al op Amsterdamse leest ebouwd en dan kan 't nog een bettien meer allure kriegen. Ik denke dat Hans van der Hoeve daor wat mien in verlègenheid kan komen, want zien wiege stun wel in Vaossen, mar hee is noe een echte Epenaar. De Vaossense groep maak zich druk veur 't museum, mar is nao vieftig jaor zelf nog lange niet an 't museum toe. 't Was dus een kwestie van kiezen en 't veur de kiezen kriegen de afgelopen wèke. De VVD zetten met Ruud Jager een peerdemiddel in. Dat hef niet ehölpen.

Hee zit noe zelf wel in de Silo temee en ruud is weerbarstig, dat vergeet nooit. Veur de butenlanders onder ule: ruud is in algemeen beroerd nederlands onkruud!

In Elburg en Oldebroek heb de lokale petiejen gien profijt etrökken van de landelijke opmars. Die hölt kennelijk op an de andere kante van de bult. Wie zult 'd'r vier jaor mee mutten doen beste mensen. Of ze krieg in Den Haag en Aarem de kronkel in de kop en vèèg Vaossn bie Apeldoorne en Waopmvelde bie Hattem, waordeur Epe en Heerde vrie spel krieg. Luu, ik kieze veur een bakkien van Merie. In Epe zult ze 't veurtaan met meer naodruk een bakkien troos numen. Holt de klongels d'r onder.

De groetenisse van GAIT.