Gait van de Renderklippen

't Meneertien van de Krante is in opperste verwarring. Hee volg zo as ule wel weet de strapatsen van de gemeenteraod in Epe en in Heerde al bienao zestig jaor. Ze vraog um wel is wat daor 't verschil tussen in. ,,In Epe krie-j een kukien bie de koffie; in Heerde een kruwagen vol hartelijkheid", zeg hee dan. En wat gebeurt d'r net veur de verkiezings? In Heerde op elke taofel van elke fractie een schale van kukies in soorten en maoten. Hendik uut de Veldsiet en 't Meneertien vormp de fractie van de pers za-k mar zeggen en die kregen ok een flinke portie. Die heb zich wel vermaak die aomd van de politieke droefenis. Veur de zoveuste keer genaol aover afval. Zelfs töt twee keer toe schorsen. Ze heb weet van tied noch duur, want waor Fred de Graaf ze tien minuten gaf namen ze een klein half uurtien. En toen waren ze 't nog hastik oneens. ,,Ik wete wel wat ze in Heerde veurtaan bie 't vuulnis mut zetten", zei d'r ene achter 't Meneertien op de publieke tribune. Terug nao de kukies. De griffier van Epe, Vincent Smit, was ok de hele aomd anwezig. En daor geet mien een lichien op. Hee was daor niet veur de gezelligheid, mar umme zich in te warken as hulpgriffier. Nee, niet as hulpsherif, want dan zol hee veur Ben van der Linde in de plaatse komen. Ik begriepe 't wel, zei 't schrievertien, Ben was d'r niet en dan krie-j van die babbelegoegies. Smit dan is gewoon dat hee en Van der Hoeve as eerste van die deernties van de bode iets bie de koffie krieg. Ze wollen um gien ontwenningsverschienselen anpraoten en dus gelieke ok een hele schale van die zutigheid. Met honing vang ie meer dan met azien, zo in die zin mu'j 't zien. 't Meneertien hef Vincent met één gebaar dudelijk emaak hoe goed de pers in Heerde kan wâârken. Niks weg estop achter de rugge van de raod bie een tochtige deure. Een breed buro met anslutings veur de computer, goed zicht op de volksvertegenwoordigers en gaot zo mar deur. Dat heb ze nao 't verbouwen van de raodzaal in Epe nog niet veur mekare kunnen kriegen. 't Hef d'r alles mee van doen welke rol a-j de media toekent.

Zoveule meugelijk op ofstand hollen of ze een volwaardige positie toekennen. Misschiens dat Smit de nieje raod in Epe is een keer een kiek in Heerde kan laoten nemen. 't Niet of doen nao 't Meneertien toe dat een collega van 't dagblad d'r kennelijk wel vrede mee hef. As d'r ene in 't kanaal sprink dut hee 't toch ook niet? Ik heb al heuren zeggen dat ze ambtelijk in Epe tegen een goeje plekke veur de schrievers bint. En ambtenaren bint dus de baas in de Silo van Bibo. Vandage niet vergèten umme nao de stembus te gaon. Hande bie 't potlood zogezegd. Laot oe niet veur de gek hollen deur 't narcisme van de politiek. Die laot weten hoe geweldig ze 't wel niet heb edaon in de afgelopen vier jaor. Laot dat aover an 't volk. De raod stik zich veur de helfte in 't niej. 't Lup nao paosen. Palm Palm Paosen, de wind kump weer uut Vaosen zeg Merie. Wat dat an geet is 't politieke weer in de gemeente bestendig. Of stik hier vandage een politieke störm op? Ie kunt Gait veule wies maken mar hee geleuf niet in spreukies. Eendracht maak macht en dat is al vanaf 1970 niet anders in de Silo.

De groetenisse van GAIT.