Gait van de Renderklippen

De tillefoon stun de afgelopen wèke roodgluuiend bie mien en bie 't Meneertien van de Krante. Peerdevolk, mar niet alleen dat, van Vaossen töt Epe via Uune en Emst. Hoe 't toch in vrede meugelijk is dat d'r gien steun in de raod is veur een evenement waor Epe al 24 jaor mee op de kaarte steet. ,,Uule bint met zien beiden wereldrecordholders: dik zestig jaor columnist en ruum zeuvenenvieftig jaor Luus in de Pels in Epe en Heerde. Dan lao-j oe toch niet langer bestrullen? Ik zag 't Meneertien in de Silo van Bibo en vot was hee weer." Ik hebbe 't namens um uut eleg.

Nao de verbouwing van de raodszaal deur Van der Hoeve zien veurganger is de tribune veur de pers esloop en heb ze die bie de deure in de tocht ezet zonder fatsoenlijk bureau umme op te schrieven en al helemaole gien ansluting veur de computer. En stille mar, de raod is d'r mee bezig. Ze nemp de tied. Ik denke dat ze nao tien jaor al een ende op scheut bint…… ,,Mar Gait, as d'r in een wip en een scheet een heel hekwâârk in de bos ezet kan worden is ene stoel toch een fluitien van een cent." Tja, dat is politiek en daor kan ik bèter 't Meneertien veur an 't woord laoten. ,,Jaja, Palm Palm Paosen, de wind die kump uut Vaossen", schreeuwt d'r ene deur 't mobieltje. ,,Vergèèt niet dat de wiege van de burgervader daor ok hef estaon. Ene petieje maak in disse gemeente de dienst uut; de res lup d'r achter an. Blie dat ze mee meug doen. Klapvee Gait." Ik holle mien wieslijk op de vlakte. Wieter geet 't. ,,De niejjaorsreceptie van de gemeente lag op de konte. 't Meneertien hef met de vriewilligerspries en de sportpries d'r veur ezörg dat de tente noe vol is. Hoe kan hee 't dan verkroppen umme gien fatsoenlijke stoel te hebben umme zien wâârk te doen?" Ik hebbe ezegd dat de deernties in 't gemeente tehuus um geweldig goed verzörg, mar dat hee noe dankzij de digitaliteit thuus alles kan volgen. Daor tap 'tKnuffeltien um een bakkien in met wat d'r bie. ,,Mar Gait zeg noe zelf, aoveral in de buurgemeenten zit ze elke veertien dage met de pers umme de taofel. In Epe heb ze 't onder de Hoeve verpletterd. Daor mutten ze gien pottenkiekers."

Ik hebbe veurzichtig anereurd dat griffier Smit noe ok deur Heerde is inehuurd. Die mut daor met eigen ogen hebben ezeen dat daor de pers een plaatse van een daalder hef en dat daor eerst met Inez Pijnenburg en noe met Fred de Graaf een alderkeizers goeje band met de media besteet. ,,Gait Gait, ik had oe wiezer edach. Die Smit is een veuruugescheuven pos van de Stedendriehoek umme Heerde in 't gareel te kriegen. Temee wordt daor de media 't naor 't trappenhuus verwezen." Ik holle ze veur dat ze dan eerste umme Fred hen mut en dat Heerde zien eigen beuntien kan döppen. Mensen mensen, heb ik ezegd, wie krieg 't noe volges bee en wee met 't burgerpanel veur 't zeggen. Ik pruuve de broes op de mond an de andere kante. ,,Een panel met jaknikkers. Heb ze oe of mien daor veur evraog?" Ik laote d'r samen met 't Meneertien mien gedachten aover gaon. 't Volk is hellig. Hef dat weer net zoveule invloed as de ofgelopen veertig jaor? "Meert reurt de steert", zeg Merie mar die hef 't denk ik aover 't weer. Weer 't zelfde?????

Groetenisse van GAIT.