Gait van de Renderklippen

't Hef 'm lang tegen ehollen, mar uuteindelijk hef zien Hannie 'm dan toch zo vàr ekregen: meegaon nao Bad Emst, bèter bekend as de Veluwse Bron. Mar ik zie 'm daor de komende tien jaor nog niet weer te water. Gerrit van de Koeweg, umme 't mar is bie de naam te numen, zag 't niet zo zitten umme niet één stuk van, mar 't hele lichaam aover te geven an de welness. Wel in 't nes, mar dat is andere koeke. Ie hoef oe daor niet helemaole in oew Adams kostuum te begeven. Nee, d'r bint ok de dage da-j in 't badpak de sauna en andere hökkies in kunt gaon. Gerrit hef gien koldwatervrees, plompen zonder bedenkings de grote viever in. En schik dat hee had! Met gien penne te beschrieven en al helemaole niet met de mienten. Van 't ene water in 't andere, kold, water, lauw: 't maken 'm allemaole niks. En daornao de sauna in. Dat zol nog veule meer schik geven. 't Zweit drup oe daor onder normale umstandigheden al van de kop af, mar veur Gerrit van de Koeweg waren de umstandigheden allesbehalve normaal. Hee was nog gien drie tel in 't braodhok toen Hannie 'm nao de voete keek. Dat verklaoren nog niet zoveule, want ze kik 'm vaker nao de voete dan in de ogen. Niks mis mee a-j weten dat Hannie pedicure is die alderkeizers goed de nèègels van de mensen gezond hölt. En ok die van um vanzelf. Mar toen zee bleef kieken worden hee toch een bettien argwanend. Hee keek….hee keek nog is en zol 't liefste onder water willen duken, mar dat ku-j in zo'n hok egees niet. Wat was d'r an de hand?. Gerritman had een ampàt soort slippers an de klongels. Dinge met een bantien. Modieus zwart, mar dan ok niet zo'n klein bettien. En die slippers dan gaven af zoas Nederland dat dut veur goeje doelen. Pikzwàtte voete. De vraog was waor of hee die zo gauw mos laoten. Achter 't elastiek van de badbroek stèken was vanzelf gien optie. Wie dat kan kump in 't circus as topacrobaat. ,,Heel bezunder, iederene geet nao de wellness umme d'r weer lakker schoon uut te komen en ie komp d'r met zwàtte voete uut. Dat is een smerig ingewikkeld kunsien",mut Hannie ezegd hebben. Zee mut in 't vervolg met de parmetaotsie op Emst an. Mar wacht is effies. De luu van 't Koefeest heb behalve een kunstwâârk en de Jo Postpries ok nog tien kaarties ekregen veur de wellness. En wèès noe eerlijk, as die temee gaot kunt ze um in de slipstream meenemen. En nem van mien an dat 't een eenmalig slippertien van Gerrit is ewes. Kottens is 'm de springtonne die 't ze in 't Algemeen Beroerde Nederlands trampoline nuump, deur de störm meer dan honderd meter weg eblaozen en bie de aoverburen in de hegge beland. Mooi bettien scha an de schure kan ik wel vertellen. Hee ston d'r wat beteuterd bie te kieken. Niet dat hee dat springtuug mis- nao een hele dag achter 't stuur wi-j wel wat anders- mar een bettien beduus dat 'm noe de wind ok nog zwàt maak….'t Meneertien van de Krante mut mar niet te hard staon te lachen. Hannie nemp um elke maond bie de bene. Hee dut d'r goed an umme Gerrit die van de kaarte was an een kaarte veur Bad Emst te helpen. Dan kan hee daor revanche nemen.

Ontvank de groetenisse van de hele kraom met inbegrip van GAIT.