Gait van de Renderklippen

A-j een auto bestuurt mu-j de gedachten d'r bie hollen. Ie kunt ok gedachten kriegen, a-j die 't stuur mar niet laot aover nemmen. Op weg van Epe nao Nunspeet aoverkwam 't mien. Een paar keer al teveurten menen ik dat iets was veranderd en toen zag ik 't in ene keer: de waarschuwingsborden tegen de anwezigheid van wilde vàrkes staot de andere kante op. Dat bracht mien met de gemeenteraodsverkiezings die d'r an zit te komen töt een vargeliek. ,,Zeker dat die 't volk ok de konte toekeert", meent Merie. Tja, dat lig zo veur de hand. Mar d'r is natuurlijk meer. A-j as automobilist in ene keer umme een bocht drie vàrkes op oe of ziet komen dan ku-j daor flink van schrikken. Mien zwaoger Jan trappen al een keer bots op de rem zodat ik met de kop tegen de veurrute an sloeg. Dat gebeurt kennelijk vaker en hef de provincie doen besluten umme de diers minder bedreigend te maken.

In de politiek bint fracties zich in disse tied bewust wat ze vier jaor geleden heb belaofd en daor kruup ze 't liefste ok mar zo diep meugelijk veur de bos in. De vrees veur afschot zult zowel de zwijnen as de politiek vulen. Ja, en 't lig veur de hand dat 't zowel wat de hoeveulheid vàrkes as 't gevuul van 't volk bie de politiek bie de wilde vàrkes of is.

In de buurte van de borden staot um de zoveul meter paolties die geluud maak as een viervoeter te dicht in de buurte van de weg kump. In de politiek is dat nog wat slimmer. Daor schreeuwt ze 't net as vier jaor geleden van de daken. Daor waor de vàrkes 't liefste 't bos in vlieg bint ze in de raod juus bevrees umme 't bos ín estuurd te worden. De mens hef noe ene keer een ander signaal neudig umme vaste te stellen of 't in de goeje richting geet. Epe is met al die beeste honderdentien procent wild en dat ku-j vanzelf niet zeggen van 't enthousiasme van de kiezer veur de politiek. Al die borden en paolties kost een paar griepstuver,mar zeg noe zelf: goeje raod is ok duur! D'r bint ok raakvlakken waor a-j niet an mutten denken: as ie onderweggens as bestuurder niks veur de bumper krieg dan zwijn ie. Zowel de hoeveulheid zwijnen as de politiek nemp in disse tied een hoge vlucht.

Die van de vliegtugen uut Lelystad kunt wel is een grote rol speulen, mar daor heb de vàrkes dan weer gien last van. De dieren blief lege bie de grond; de mens geet veur de hoogzit. Waorbie 't in de verkiezings geet umme dat wat oe as kiezer hoog zit. De diers loop weg veur de jager en a-j de kiezer mag geleuven de politiek veur eur verantwoordelijkheid. In beide gevallen völt d'r iets te kiezen: al dan niet de weg op. Ik bin bienao bie 't rooster. Daor scheidt zich de wegen van mens en dier. In ene keer kump d'r een wagen van de andere kant recht op mien of. Een sjaffeur van nog gien twintig. Bie de wilde vàrkes of. Mar dat is niet netties nao de dieren toe. En deur dat gedoe mis ik de ofslag nao de A28. Dat wordt keren.

Een verstandig wild zwijn dut dat ok; in hoevàrre 't op de eenentwintigste meert veur de kiezer van toepassing is blif ofwachten. In elk geval niet nog een bult petiejen d'r bie want dat gekeutel ku-j bèter an de vàrkes aover laoten.

Ontvank de groetenisse van GAIT.