Gait van de Renderklippen

As ik bewere dat 't eerste elftal van de voetbal uut Uune 't pad kwiet was dan denk de meesten van uule die in de voetballerie thuus bint, dat 't al een heel tietien eleden mut wèèn. Ze staot noe immers heel hoge op de lieste en kunt temee nog wel kampioen worden ok. Nee, nee, beste mensen: Gaitman weet echt wel wat of hee schrif: 't was kottens. Ik zal 't uule uutleggen hoe of 't vlaggeschip van de klompenbrigade ofezeild is nao vàrre oorden. Onbedoeld en helemaole tegen de zin in. 't Was tegen 't ende van de winterstop. Dan gaot voetballers die d'r iets meer van kunt, de selectie ze-k mar, niet achteraover hangen, wilt fit blieven en speult dan vriendschappelijk. Dat deed ok Uune. Op de Elspeetse hei tegen de club van die naam, die veurig jaor ok nao een hogere klasse is deur estoten. René van de Vosse was de sjaffeur. Dat ku-j wel an um toevertrouwen. Zekerheid veur alles en dus schakelen hee de waorzegster in die 't ze Tom Tom nuump. Wat een vremde name, want 't is een vrouwe die oe blindelings de weg wis en een vrouwe die Tom heet bin ik nog nooit tegen ekomen. En Tom Tom is dan al helemaole van de gekke. Mar goed, naodat ik mien heb laoten vertellen hef René 't adres van de lieste van de Voetbalbond epluk en hef die an de waorzegster toevertrouwd. In Elspeet vund Arend Jan Pannekoeke dat 't wel wat lange duren veurdat René an kwam zetten.

Was 't dan een Vosse-jacht eworden? Dat ku-j wel zeggen. Want toen die bie 't sportpark kwam was 't hastik duuster. Gien mense te zien. Deur 't licht van de straotlanteerne zagen ze wel de name van de club…….Terschuurse Boys! Dat is in de buurte van Amersfoort! Dan mutten ze toch wel hevig an de klets eraak wèèn, want dat bint nogal wat kilometers vàdder. Een noodsignaal uut Elspeet en dat met honderdenvieftig an 't uur nao de goeje plekke. ,,Ik hadde oe wiezer edacht", zei Arend Jan. Die wees d'r op dat ze tegen Elspeet al is een half uur langer dan de negentig minuten hadden espeuld toen de scheidsrechter een horloge umme had dat hee bie een pakkien margarine cadeau had ekregen. Toen waren ze in Uune knap hellig in de botten. In de sport vergèèt ze dat soort dinge ok weer gauw, dus konnen ze daornao weer vriendschappelijk tegen een balle trampen. Ik wete niet of ze zich in de auto al heb verkleed, mar dat 't een mooi poossien later begun dan ze hadden vaste esteld is zo vaste as mien auto laatst in de klei an de diek was eraak.

Naodat ik eheurd hebbe waren ze pas tegen middernacht weer in Uune. Hoe of 't of elopen is daor op de Elspeetse hei kan ik uule niet naovertellen. 't Hele verhaal kwamp mien ter ore via 't Meneertien van de Krante en die vernam 't op de vriewilligersaomd van 't Koefeest. Jan die de zegsman was had d'r toen al een stuk of wat deur de sloeke laoten gaon naodat ze mien vertellen. In elk geval is Uune de weg in de competitie niet kwiet en doe't ze 't baoven verwachting. En Van de Vosse gebruuk veurtaon vaste zien eigen verstand in plaatse dat van de waorzegster. Luu, genog veur disse wèke, a-j nog wat te verhapstukken heb, laot 't mien weten. Ik holle een plaatse vrie in 't huukien.

Groetenisse van GAIT.