Gait van de Renderklippen

An 't ende van 't jaor wordt de bordjes verhangen, slao-j de blaadjes umme. 't Kan ok dat die 't uut zichzelf doet. En dat noe heb ik veurege wèke ondervunden. Misschiens is 't uule allemaole wel is aoverkomen. Mar nao ik mag haopen niet met dezelfde vervèlende gevolgen. En as biekomstigheid ok nog dat Merie noe een hèkel an katten hef, waordeur ik an 't ende van 't jaor met een kater blieve zitten. Nee, wacht effies, leg 't huukien nog niet neer.

Ik zal 't uutleggen. Ik hadde ofepraot met 't Meneertien in de Rama buurte. , t Was niet bes op de weg en gien weer veur de Harlie Trapson, as ik de fietse zo mag numen. Dus de auto uut de schure. Niks mee te doen, de wègen al weer snee vrie. An 't ende van een jaor schut oe van alles in de gedachten. Uule kent dat. De plussen en de minnen en wat af had mutten wèèn en waor aj nog an mutten beginnen. Gien ideale uutgaonspositie veur een sjaffeur, dat hoef ik uule niet uut te leggen. Noe bin ik niet zo kippig achter 't stuur as Arend Vinke, die veur de dàdde keer dit jaor een brille is kwiet eraak en noe elke dag in de mist ridt, mar ok a-j alles goed ziet is filosoferen niet iets veur in een auto, nog egees niet veur een bierieder.

Dus gauw de andacht bie de weg. Ik lette altied op veur aoverstèkend wild. Dan heb ik 't niet allenig aover groot wild, mar ok aover kleinere diers. Op een gegeven moment in de buurte van de Middenstip in Epe vleug d'r wat veur mien karregien heer. Nao ik menen een kàtte en ik trappen geliek op de rem. Gien snee meer op de weg, mar kennelijk nog wel een bettien an de gladde kante. Daor kwam Gaitman an 't slieren. Binnen de seconde, nog gauwer as een flits, raken ik een betonnen paoltien en daor mos ik, nee mien auto dus, 't glansrijk tegen ofleggen.

Een beste deuke an de veurkante. En dat allemaole umdat ik een hâârfsblad veur een kat had anezien. Hoe leg ie zoiets uut an 't strenge regiem van Merie! Ik heb dus mien inbeeldsel van de kat d'r mar bie ehaald. En dat pakken verkeerd uut. Dat wil zeggen: niet veur mien, mar wel veur de diersoort op zich. Merie is gek van Bouffon van Annegien, mar mut niks van kàtten die elke keer weer behoeften in de hof achter laot waor zee dan net de botten op hef ezet umme die toonbaar te maken. En zo hef een van de laatste bladen van 't jaor mien met een kater achter elaoten.

Ik zal 't bie mutten sturen umme de kattenkolonie op de Klippen in bèter anzien te brengen bie de vrouwe. Zeggen dat de denkbeeldige kàtte mien dankbaar an keek van de andere kante van de weg of zoiets. Ik denke niet dat ik daormee 't gemiauw van Merie uut de weg kan rumen. Wieter veur de res heb ik gien klagen. De vieftigjaorige vechtvereniging maken dit jaor wel bezunder. Dat zal ik nog inbrengen op de bie-eenkomste van de puffertiesclub, die traditioneel op oldejaorsdag bie Henk Huuskamp an taofel schuuf. Met nog weer een stellegien nieje olde Epers as ik 't zo mag zeggen. De enige club in de regio die ene keer in 't jaor bie mekare kump en dan dat hele jaor op de schuppe nemp. Laot ik ofsluten met uule een goed uutende en veule euliekrabben en veurspoed te wensen namens Merie en de hele kraom.

GAIT.