Gait van de Renderklippen

Herman Bodewes hef zien eigen glazen huus. Niet dat hee daoir gelukkig mee is. Alles behalve. 't Liep uut de hand: nao de letter en nao de figuur. Hee wol zien kleinzeune verrassen met een nieje wand in de douche. 't Hef d'rnogal veur ehollen umme zon dink dat passen te bemachtigen. Hee slagen nog net veurdat 't hele land een snee dèken aover zich hen kreeg. 't Is een druk mannegien. Lup zich de bene uut de haok veur de reumapatiëntenvereniging waoras mien Merie ok met van doen hef.

Op de terugweg van een lange vergadering in de Randstad bint ze in Ermelo tegen de wand a elopen. 't Deud niet zeer, integendeel, want dat was de wand die hee neudig had umme de douche daormee in te richten. Herman is wat a-j nuump een handige knooiert. Die kan deur de verpakjking hen lèzen wat d'r mut gebeuren umme 'tspul goed in mekare te zetten. Laot dat mar an um aover. Hee kon zien Christien d'r niet bie hebben. Dat monteren mut op de millimeter nauwkeurig en as ze oe dan an de praotholt geet 't helemaole verkeerd.

Dus Herman an 't wâârk. Een karweigien umme met fluwelen handschoenen an te pakken. Veurzichtigheid troef. Hee had de tong d'r bie uut de mond hangen. 't Uutpakken gunk merakels. De res ok. Machtig wat een mooie wand. Daor zol dat mannegien van opkieken. Hee bekeek zien wâârkstuk vanveuren en van achteren. De ogies glummen van trots, Zo, noe kon hee met een tevreden gevuul weer op huus an umme Christien te vertellen dat 't een prachtstuk was eworden. Net veurdat hee de boel inpakken zag hee nog een stuk gereedschap in de douche liggen.

Hee is een net mannegien dus dat mos weer mee op Heerde an. Hee bukken zich en…..mos gelieke in dekking.Met 't dikste deel van de rugge stoten hee tegen de wand. Ik kan uule niet vertellen wat zoiets te wèèg hef ebracht. Duuzend splinters is mar ene. En een knal: as of d'r een straaljager in de viefde versnelling deur de geluudsbarrière was ejag. Herman is d'r zonder verwondingen vanaf ekomen. Mar de mentale scha was met gien penne te beschrieven. Zon geweldig mooie wand en dat an flarden nog veurdat hee d';rkond van kon doen. Mer datzelfde woord met een t op 't ende was de schuld van alles. 't Oprumen van al dat glas was een alderkeizers secuur karweigien. En toen dat commentaar. ",,Herman, ie hadden toch veule dichter bie 't Glazen Huus kunnen vienden.

Bie oe in Heerde steet d'r ene." En: ,Kêêrl wat mut ie een bonke geluk hebben met zoveule gebreuken glaswâârk. Ie komp temee van geluk nog onder de trein." Van armoe mos hee de hele gang vanniejs maken. Weer op Ermelo an en weer de hele montage vanniejs. Dikt keer drééjen hee zogezegd de konte d'r uuten gujnk 't allemaole merakels goed. De parm,etaotsie hef d'r van geneuten. Zien kleinzeune zingt onder de warme straolen aover 'Mien opa' en daor kan de hele buurte van mee genieten. Merie muit daor heel var uut de buurte blieven. Want stel oe veur dat ze ok gedachten aover de douche krig. Doe van ons is gelukkig nog niet zo lang vervangen. En ik hoeve Herman ok nkiet te vraogen. Die kik mien dan vaste me een glazige blik an.

Doet d'r kalm mee heer en ontvang de groetenisse van GAIT.