Gait van de Renderklippen

Wimpie van Diene hef Heerdenaren hoge zitten, mar van de wèke kon hee ze wel schieten. Hee had in disse krante elèzen dat d'r een hoop gedoe is met de Brinklaan. Daor jaag fietsers en automobilisten mekare dagelijks zowat van de pinnen. Wonderlijk genog geet 't bienao altied net goed,mar luu die bie 't gezondheidscentrum woont holt eur hàrt vaste as ze weer gepiep van remmen heurt. Wimpie zien moe hef vrogger in Heerde an disse straote ediend. Ze woont al sinds jaor en dag in Meppel, mar blif Heerde volgen. Ze hef eur jonge evraog umme wat foto's te schieten van die straote en veural op de plekke waor nog zoveule voetstappen van eur staot. Vanzelf wol hee dat wel. 't Was een bettien dampig die dag. Toen hee de eerste opnames maken en die d'r wat flodderig uut zagen gung d'r nog gien alarmbelle rinkelen.Mar wat hee an an 't toestel drééjen en knooien, de opnames waren en bleven mistig.

Ok die van Sylvia van Amersfoort die speciaal veur um nog een keer met een oldere dame model stun. Hee worden van kwaod töt hellig. Dat gunk niet ongezien want de Heerdenaren die um zagen raozen en tieren gaven ongevraogd raod. ,,Ik zol daor is nao kieken", ,,Dat knöppien daorrechts mu-j indrukken" en as olie op 't vuur ,,Ie heb dat dink zeker op de punten van e koffie aneschaf." Hee had zichzelf nog net in zovàrre in bedwang dat de neigingen umme 't apperaat tegen de keien te smieten gien realiteit werden. Veurdat hee in de auto stappen umme zien moe de onheilstijding te doen nog effies gauw een zak met zolte dröp kopen: daor is moe gek op en Wimpie zelf niet minder. 't Was druk in de winkel. Bie de kassa stun d'r een hele sliert achter 'm. Weinig geld in de knippe mar met de pinpas maak dat niks uut. Verdikkeme…Normaal zit dat dink veuran. Niet dus. Drie vakken. Hee was al op temperatuur deur 't gedoe an de Brinklaan en noe raken hee an 't kaokpunt.

Alle vakken nao ekeken, plastic genog mar gien pinpas. De vlammen sleugen d'r bie 'm uut. En weer was Heerde behulpzaam. ,,'t Gebeurt mien ok wel is. Kalm blieven en in 't vakkien met bankbiljetten kieken", ,,Weet ie zeker da-j 'm d'r in heb estop" en gekuch achteran in de rieje van mensen die 't wachten zat waren. 't Is de snelste manier umme van wit via rood nao paors of peers te schieten. Hee roppen van helligheid de knippe deur mekare en toen viel d'r een verfrommeld brieven van tien euro uut waormee hee zien schuld kon inlössen. ,,Geduld is een schone zaak", mos zoneudig ok nog iemand opmàrken. 't Zakken löslaoten of dichte, vreug 't deerntien an de kassa. ,,Lös dat dink, veurdat ik in Zwolle bin heb ik de inhold al achter de kiezen", zei Wimpien tegen de de kassière die daor gien chocola van kon maken. 't Pakken anders uut.

Zien autogien bie de Johanneskàrke hadden ze klem ezet. Nao een stief kwartiertien kwam d'r een oldere dame die zei "Kolt hè", de bosschappen achterin gooien en de dampige wereld in reed.

Bie Wimpie sleug de damp d'r of. In zukke gevallen ze-k ze vaak "Weet ie wa-j doet, maak d'r een foto van". Mar ok dat gunk dus scheef.

De groetenisse van de hele kraom met inbegrip van GAIT.