Gait van de Renderklippen

Verschil mut d'r wèèn ze-k ze. Veronderstel dat alles en iederene 't zelfde was. Dan kon ik de penne wel an de wilgen hangen. Nemp noe Epe en Heerde. Volges een bonke luu die zich kenners nuump wordt d'r deur de hogere overheid an ewâârk umme Epe en Heerde bie mekare te voegen. Dat mut ik eerste nog zien. Allenig bie ons op de Renderklippen is 't wa-j nuump één ziel ene gedachten. Mar d'r mutten heel wat meer schaopen aover de dam veurdat zoiets warkelijkheid kan worden. Ik mosse daor vergangen wèke nog aover denken. Nao anleiding van de griepspuite. Merie en ik bint daor ok al jaoren bie van de partie. Ik wete in vrede niet waor of dat spul oe tegen beschàrmp. In elk geval niet tegen de hondsdolheid heb ze mien uut eleg. Wie waren niet de enigen. Alderkeizers wat een rieje stun d'r.

Bie een prikaksie denk ie an iets wat in een poep en een scheet veurbie is. Dit nemp ietsies meer tied in beslag, mar wule stunnen d'r toch van te kieken hoe gauw of ze 't volk wegwâârkn. Umme 't met al die mensen in de rie te hollen kregen ze naodat ze de mouwen weer recht hadden etrökken een appel. Gien bellefleur, want rood an elopen waren de meesten toch al van de angst veur de naolde. Kom ik Harm uut Vörchten tegen en raak ik met um an de praot aover die spuite en vreug hee mien of de mandarijnen in Epe ok zo lakker smaken. Ik heb um met grote ogen an ekeken. Mar wat bleek: in Heerde krieg de mèènsen, zo sprèèk ie dat uut, gien appel, gien sinasappel mar 't breurtien daor van. Noe hadden ze dat nao mien gevuul bèter umme kunnen drééjen, want Heerde zit krap bie kas en kan een appeltien veur de dorst heel goed gebruken. Merie is gek op mandarijnen. Ze zeg dat ze as Renderlipper van 't zuverste water eigenlijk aover twee paspoorten beschik en dus volgend jaor mar in Heerde an zal schuven.

Met twee paspoorten ku-j zelfs in 't kabinet en daormee Wilders op stang jagen, of niet dan? In Epe krie-j in de raodsvergadering kuukies bie de koffie; in Heerde mu'j 't met de aldervrendelijkste lach van de bodes doen. Eerlijk is eerlijk: ik heure van 't Meneertien wel dat ze oe zonder da-j d'r umme vraog zo twee klunties suker ekstra geef. A-j Heerde binnen sjachert heet oe de bloemen een hartelijk welkom; kom ie bie de Rozenhof in Epe dan ku-j 't verstand op nul zetten umme toch te weten da-j in Epe bint. In carnavalstied misschien wel Onkruud City.

En daor zit ie dan mee. In Epe zörg de wilde vàrkes veur spektakel: in Heerde dut dat De Heerd. In Epe woon ie veur een habbekrats; in Heerde bi-j flink wat duurder uut. Heerde steet met de voetbal baoven an de lieste; Epe bungelt onderan. Ene gemeente? 't Slimste zal nog wèèn umme de enties an mekare te knuppen: in dit geval Waopmvelde en Vaossen. De dialekmaffia hölt een schriefwedstried veur inwoners van beide gemeenten. Dat liek een goed veurbeeld. Mar is d'r ok niet zo ietsies as: wie schrif die blif? D'r zal nog heel wat water deur 't kanaal gaon veurdat de plannegies serieuzer wordt en dat water stroomp niet biester hard. Serieus lig dichte bie zereneus en die zult ze nog wel is oplopen onderweggens.

Ontvank de groetenisse van GAIT.