Gait van de Renderklippen

't Is zunde dat in dit huukien gien petretties pas. Dan was vast en zeker de openingshandeling van wetholder Jan Berkhoff op disse wieze vaste eleg. De enige wetholder die Epe en Heerde in die funksie an zich hef verplicht stun naos Fennie Tiemens van de vriewilligersorganisatie Plu op de planken in de Koninklijke Heerd. Fennie weet al een jaor of acht vente te interesseren veur vriewuilligerswark en Heerde steet daormee in pole position, ze-k mar gewoon veuran. En Jan hef daor een hoge dunk van op. Toen hee an de kinder vroeg wat of een wetholder dee-j zei d'r ene op de tribune zachte: goochelen. Gien wonder, want achter de wetholder stun op een groot bord: goochelaar Jan. Dat was niet de wetholder, zoas bleek, mar een echte goochelaar die achter de gedienen stun te wachten tötdat hee op noch treden. Wetholder Jan zal misschiens de gelègenheid te baat hebben eneumen umme goochelaar Jan te vraogen um een paar truukies te leren umme zo 't gedoe met De Heerd en de WMO töt een goed ende te brengen. Mar ik denke zo dat 't college daorveur Hans Klok en Hans Kazan samen mut inhuren met een truuk speciaal. ,,Wie 't kleine niet eert kump niet toe an De Heerd", zeg Merie en die kan mien toch somtieds uut de hoek komen. Aover speciaal espreuken. Ik wete niet of uule de leste tied de pannenkoek speciaal van De Ossenstal deur de sloeke heb laoten glieren. Gewoon doen. Ik schrieve dat niet umme 't uuthangbord te speulen. Nee, ik hebbe met Merie kottens wel ervaren dat de weg d'r nao toe vol met hobbels en kulen zit. Ie wordt helemaole deur mekare eschud. Noe was dat op de henweg niet zo'n probleem: de weg terug was andere koek. Halverwège de Dellenweg bi-j al weer an een nieje pannekoeke toe kan ik ule vertellen. En veurdat ik vàdder gao waarschouw ik ule mar vaste dat dit huukien een bettien onpasselijk karakter dreig te kriegen. Daor stuur ik zeker niet op an, mar soms loop dinge zo as ze loop. Een vrouw van een voetbaltreener tippen mien van de wèke aover eur sportstieve man. Ik hebbe met de hand op't hàtte mutten belaoven gien name te numen. En as Gait ene keer ja zeg dan kump nee niet meer in de buurte. Die naamloze treener dan maak zich al wèken lang hellig op zien selectie dat ze teveule angsthazen voetbal speult. Veurege wèke liep hee rood an toen ze d'r weer niks van bakken. ,,Ik wille druk zetten", zei hee. ,Van veuren?", vreug d'r ene. ,,Nee kuken, van achter te beginnen", mut hee schuddekoppend hebben e antwoord. Hee was d'r volgens zien vrouw tuus nog niet klaor mee. Wol eur mening ok wel weten. Ze hef zich op de vlakte ehollen en um een beste preuze nasi goreng veur de neuze ezet umme te kalmeren. Mar hee begun d'r zo weer aover. Toen zee ok druk van veuren nueme begun hee te schreeuwen: nee druk begint van achter soeze. Twee tel later zetten hee 't op een draf. Onder invloed van de nasis goreng begun de druk van achter te wàrken. Ik zal ule de details bepaoren mar zien pogingen umme 't kleineste kamertien op tied te bereiken bint mislukt. Hee zal d'r zich in de kleedkamer vaste niet meer druk umme maken.

Ontvank de groetenisse van de hele kraom inclusief GAIT.