Gait van de Renderklippen

Ie heb van die wèken dat 't oe as columnist niet mee zit. Da-j gien inspiratie heb en de tied tegen oe geet wârken. Dat was de afgelopen dagen zo. Tötdat mien de sleutel zowat letterlijk worden an ereik. Deur 't Meneertien van de Krante. Die hef heel wat meer staon zweten dan dat ik transpireren. En zeker ok onder veule minder gerieflijke umstandigheden. Oe de kop gek prakkezeren in de leunstel is nog altied heel wat comfortabeler as midden in de nacht oe eigen huus niet in kunnen. En dat aoverkwamp um en zien Knuffeltien. Ze hadden een feessien wat uutliep as een tulp van de beste kwaliteit. Gezelligheid kent gien tied ok al was 't gien vriegezelligheid, mar meer een weerzien van olde knakkers. ,,Ik bin toch wel blie daww temee onder de wol kunt, want a-j 't zo late maak dan vertelt oe 't lichaam wel da-j gien achttiene meer bint", zei hee terwiel hee de sleutel in 't slot stak. Mèt de sleutel kotten de nachtrust van 't mannegien. Een lelijke breuk zol de chirurg zeggen: net of ebreuken bie 't gat met nog mar een nauwelijks zichtbaar stuksien wat d'r uut stak. Daor stao-j dan met oe goeje gedrag en een ondeugende vrouwe die oe löt weten da-j twee linker hande heb. Mar zelfs al had hee vief rechter klavieren dan was't verhaal d'r niet anders deur eworden. Hee hef mien vaste niet 't hele tafereel bloot eleg, want 't kan niet zo wèèn dat de buurman an de linkerkante vanzelf in de ochtendjas um de hoek kump zetten. D'r is nemp dat van mien an heel wat of ekàrmp in de Ramabuurte. ,,Goejemorgen buur, nog late op?" kreeg 't schrievertien te heuren. De mini hulptroep was niet verstoord en gunk gelieke töt aksie aover. ,,Effies een tange halen, ie hoef hier niet lange te blieven staon", zei de man. Mar dat zat um en 't Meneertien niet glad.

De buurvrouwe missen kennelijk iemand naos eur en die kwamp d'r ok al bie en namp 't mopperende Knuffeltien mee. Nao een minuut of wat mossen de beide mansluu toegeven dat 't gien verlossingstange was. 't Meneertien was al zo veere dat hee wel un bakskeie deur de ruten wol gooien. Mar zelfs dat beheuren niet töt de meugelijkheden, want de rolluken zaten d'r veur. 't Was op de plekke des onheils niet bladstil vanzelf.

Ik denke dat 't d'r helder op ging, want ok de buurman raken van 't perseel. Töt aovermaat van ramp worden de hemel ok nog verdrietig en liet de traonen aovervloedig stromen. Naargeestigheid in de viefde versnelling.

Op een gegeven moment voegen de buurvrouw van de andere kante in de peignoir zich bie 't gezelschap. Die heuren 't allemaole is an, maken zich uut de voete, kwamp terug, halen een magneet teveurschien, trök 't stuksien sleutel d'r uut, zei "Welterusten" buurties, drèèjen zich umme en liet de manskèèls met de mond lös achter. 't Knuffeltien kon weer uut de schuulhutte nao buten toe. Zee heuren 't verhaal an en wreef de beide kèèls in dat as 't d'r echt op an kump de vrouwluu 't verstand laot warken wat de mansluu kennelijk dan in de grote teen is ezak.

Ik wil niet zeggen dat 't noe an de Rama buurte een sleutelclub is eworden, verre van dat, mar dat 't veurval menig oldejaorsnacht zal aoverlèven, daor bin in zeker van.

Ontvank de groetenisse van GAIT.