Gait van de Renderklippen

Sjonge jonge wat een soeze bi-j toch. Ik zeg 't hardop achter 't stuur. Gien mense kan 't heuren, want ik bin allenig op pad. Mar laot ik bie 't begin beginnen. En dat lig een best ende terugge. Toen Gaitman nog jong en biester was. De tied van de verplichte militaire dienst. Da-j veur oe nummer onder de wapens mossen. Da-j anderhalf jaor uut oe wâârk worden ehaald waoran ie nog met net waren begunnen. Waordeur ie anderhalf jaor achterop raken bie ene die ofekeurd was veur 't dienen van zien vaderland en daorveur worden beloond umdat die altied meer dienstjaoren had. As troost gevulde koeken. Die mos ie van die ene griepstuver nog zelf betalen ok. In Ossendrecht mos ik opkomen en daor heb ik Henk uut de Maoten ontmoet. Wule beiden waren de enigen van de Veluwe. Deur de moerstaal te praoten konnen wule de meerderen uut de Radstad cde kas uutvègen zonder dat ze 't zelf in de smiezen hadden. Daor zol ik 't vandage weer is met Henk aover hebben. Merie vulen zich niet zo lakker , was een bettien uut eur doen e toen ik veurzichtig langs de neuze hen zei nao Apeldoorne te willen, menen ik zoiets te heuren as "Dat ok nog", 't Scheut mien pas weer een stief kwartiertien later te binnen op de A 50 tussen Vaossen en Apeldoorne. Met een schok, dat wel. Ik hadde de wèke teveurtien op de rommelmâârk een stellegien CD's eköch veur een habbekrats. Merie was d'r niet blie mee. Vreug zich of wat ik met die ofgedankte pruttel mosse. Mar zeemanslietiies veur vieftig eurocent, ze-k noe zelf, daor ku-j oe toch gien buul an vallen. Ene keer op de snelweg pakken ik die CD bie de kladden en stoppen 'm in de gleuve die daorveur bestemp is. Zo zol ik mooi op Henk anvaren. Bie de Pruus nuump ze 't ok zo: fahren aover de weg. Een seconde of wat later mut mien de mond open wèèn evallen. Waor ik op de woelige baren verwachten kwamp d'r iets heel anders uut de luudsprèker. Vieftig eurocent veur een moois deussien zonder golfbeweging. Had ik mien daor bie de bok laoten doen. Ondertussen kwamp 't tweede lieten d'r al uut. 'Kom weer naar huis. Als je verandert van gedachten.' En ie wilt 't geleuven of niet, die gedachten veranderen bie toverslag An op de kop of vierenvieftig jaor geleden dat ik Merie eur eerste smuksien gaf op de aomd in Berg en Bos dat wule mekare leren kennen. Nog net veur de ofslag Apeldoorne Noord kon ik van de A50 of. Wule viert niet allenig de trouwdagm mar ik geve de vrouwe ok altied een struke op de dag daww mekare integen kwamen. Deurumme was zee vanmâân zo van de leg. En dus had ik 't goed verstaon: ok dat nog. Rechtstreeks nao de bloemist en op huus an. Merie was bie Mina van Knelis dus iok hadde nog de tie dumme mien ekskuses te maken bie maot Henk. En toen heb ik de bloemen op taofel eleg met een kaartien d'r bie waorop ik had eschreven "Bèter laat dan nooit.' Ie hadden eur gezichte mutten zien. Ik wete niet of ze eur beklag had edaon bie de buurvrouw, mar dan hef zee noe iets goed te maken. Ik was van plan umme veurtaan op de rommelmâârk eerst in de deuze te kieken, mar dat doe ik bie naoder inzien niet. Ik laote mien mooi verrassen.

De groetenisse van GAIT.