Gait van de Renderklippen

Hee hef al genog veur de kiezen ehad dus ik wil 'm niet met zien waore name in 't huukien plaatsen. Ik heb 't aover Henk Tegenslag, die zich de bosschap veur zien vrouwe nog töt in lengte van dagen zal blieven herinneren. Ze had um d'r al zo vake op an espreuken, hee had al zo vake gien sjoechem egeven, datte d'r noe niet langer onderuut kon. Een kassien halen veur in de badkamer, waor Annie eur spullegies in kon opbàrgen. Ze had een hele schieren in de krante zien staon. Donkerbruun, passend bie de tegelties en van de goeje lengte en breedte. Henk liet eur praoten. Hee had in een advertentie al ezien dat ze bie een zaak in 't naburige dàrp dit kassien veule goedkoper anbeuden. Annie zol d'r gien weet van hebben. Ene keer in 't magazijn was hee gauw klaor. 't Bruun ietsies minder ,mar dat moch toch gien naam hebben. Fluitend vol gas weer op Heerde an. Annie wol d'r geliek mee an de gang. Toe hee de verpakking verwijderen sleug zee de hande veur 't gezichte. ,,Mar dat is helemaole niet wat ik oe anewezen hebbe. Lichtbruun, dat vluuk met de reste van de badkamer en kiek hier is, d'r zit ok een hele scheur in 't onderste gedeelte. Gaot mar weer terugge, dit ku-j niet accepteren.''

Daor stun hee met zien goeje gedrag. 't Kassien terugge brengen had gien zin. 't Was een oprumingsdink en daor hei-j gien inruilmeugelijkheid bie. Dus van arremoede nao de winkel in 't eigen dàrp um de bestelling van zien vrouwe goed uut te voeren. Hee mos toegeven dat dissen toch wel wat strakker in menare zat en dat de kleur ok veule bèter passen. Annie blie, ze vleug 'm um de nekke en gaf 'm een smakkerd. Daormee af. Dat was althans de gedachte. Tötdat hee gistermaarn van 't wàrk terug kwam en zien vrouwe 'm al tegemoet kwam toen hee 't ene been nog in de auto had zitten. ,,Lelijke knieperd. Hoe haal ie 'tin oe heuf umme 't huusholdgeld d'r zo deur te jagen. Ik kan oe wel vernielen mannegien." Henk had zien vrouwgien nog nooit zo kwaod ezien. Zelfs die keer dat hee een deel van 't servies van eur moe met de mouw van de jasse tegen de grond had emèèjd was hier niet mee te vergelieken. Veule tied umme d'r bie nao te denken worden 'm niet egund. ,,Hier. Kiek daormar is nao, klongel da-j 'dr bint." Henk had niet veuele tied neudig umme te ontdekken waor de schoen wrung. Twee brieven van Justitie. Twee keer te hard jagen op de Knaaldiek. En beide goed veur een slordige driehonderd euro. Och lieve mensen, dat gevoeg bie de strop van een kast teveule en de verklongelde kilometers was wel een hele dure grap. Veur dat geld had hee ok een kassien van porcelein kunnen kopen.

En toen hee dacht dat hee de gifbèker helemaole lèèg had kwam d'r een dag later nog een schoer onweer bie. Buurbouw Janna op visite. Die vreug 'm of hee schik had van 't kassien wat hee in de winkel in 't naburige dàrp had eköch. Ze had 'm daor zien sjacheren. Jonges nog an toe. 't Hef effies eduurd veurdat de vree weer terugge was in huus. Henk zat wa-j nuump flink in de holtgreep en kwamp daor een heel tietien niet meer uut. Goedkoop was in dit geval wel heel arg duurkoop.

Luu, trek daor lering uut.

Groetenisse van GAIT.