Gait van de Renderklippen

Veel varkens maak de spoeling dun. 't Veurbeeld is veur 't griepen in Epe. Nou ja, griepen….Dat geet hard nog niet. Um de plaog van wilde zwijnen tegen te gaon hef hans van der Hoeve een hek in de bos laoten zetten. Me4t de beste bedoeling trouwens, want wat d'r allemaole an gazons en struken verrinneweerd worden is met gien penne te beschrieven en dasor raak een computer aoverstuur van. Noe bint die varkes gien eikels, mar ze lèèf daor wel van. Angezien d'r deleste jaoren veule van die bosvruchten van de bomen komp breidt de zwijnenfamilie zich flink uut.

Bie disse beeste hef aover 't hek springen niet de betekenis die Van Dale d'ramn toe schrif dus wordt d'r in de bosd heel wat ofekraamp. Te dol umme op't hek te zetten zol ik willen zeggen umme in de beeldspraak te blieven. Echt waor, 't hek is van de dam. De diers meldt zich de leste tied zelfs in 't centrum. Nog mareffies en ze staot veur 't gemeentetehuus en bie hans veur 't buro. Ule kunt d'r umme lachen mar ze zult oe de hof drie keer umme ewoeld hebben. Nee, dit is niet bietsies umme te zeggen: laot mar schieten. Merie zwaait met eur vingertien. ,Juus wel Gait. Schieten, at is 't enige wat d'r nog aoverblif. Temee griep ze de kleine vente en dan is niet Leiden mar Epe in last. Ik denke niet dat de vàrkes van Epe zich vergriep an mensen. Die zet 't op een loopen as ze een mense ziet, groot of klein. Noe hef de gemeente zelf wel de uutneudiging op de pos edaon. Honderd procent wild schreeruwen Robert Scholten van de daken en dat 't noe honderdentien procent is eworden ku-j de varkes niet kwaolijk nemen. Ze bespart de overheid een bonke geld.

Dat waren ze kwietv as ze de beesten de bos uut mossen lokken umme de toerist te plezieren. Noe meldt ze zich zelf. Epe zwijnt daor wel degelijk mee. Hoe'tallemaole kan is voer veur psychologen. Paddie luu ze-k dat de varkes u7mme 't hek hen loop en de weg niet terug kunt vinden. 't Pas in 't eenrichtingverkeer wat steeds meer de kop op stik. Volges buurman Kenlius bint 't woelige tieden. Op de Renderklippen heb ik zse nog niet ezien, mar wat niet is kan nog komen. As Aarem toestemming gof umme de zwijnen op 't darp of te schieten dan wordt 't nieje motto van Epe: honder procent wild west. De solo van Bibo as rodeo, cowboyfilms in 't Loeffpark en Van der Hoeve as Old Shetterhand op 't podium.

Die krig nao de vollelaoge umdat die hekken kennelijk niet wâârk. Is dat terechte. Misschiens vergèèt sommigen 't hek achter zich dichte te doen of is 't gewoon zo dat vàrkes de p0olitiek te slim of bint? Veuralsnog zit d'r in 't bejagen gien schot. Is ok allemaole an regels ebunden. Hoe dan okmk is 't darp Epe ontregeld en is 't verzoek noe iets in de geest van: verzin een list Tom Poes. Bie 'tMeneertien in de Ramabuurt heb ze zich nog niet laoten zien. Daor durf ze niet af te slaon, wanbt de diers heb wel deur dat hee dan hele lelijke dinbge aover ze geet schrieven. Dus laote wule die eikel met ruste, mut de varkeshoofdman hebben eknord. Hoe't ok zit: 't is in Epe bepaold gien tamme vertoning. Mar of wat 't hek betreft de keutel noe inetrökken geet worden? Ik denke van niet. Groetenisse.

GAIT.