Gait van de Renderklippen

De Veluwe hef last van opvliegers. Stàrker nog: de gemeentes vlieg mekaar in 't haor. 't Verlangen umme de regio weer op plek één te kriegen is op (Schip)hol eslagen. De Randstad hef 't gevaor an zien komen en een eigentieds poldermodel ontwikkeld. Ze wil zich niet laoten kisten deur de boerties uut de provincie en dat bestriedt ze noe met andere kisten die akelig lege aover komp vliegen. Waor? Ja, dat is de volgende slimmigheid van 'Den Haag'. In elk geval vanuut Lelystad.

Schiphol kan de drukte niet meer an. Met andere woorden: de luu in de Randstad vlieg aoverende bie de gedachten allenig al dat eur nog meer lawaai baoven 't heuf kump te hangen. Dus mut 't nao de polder. Ze heb goed in eschat dat 't op de Veluwe altied drie keer zo lange duurt veurdat ze ââns tegen in op stand komp. Dat is pas gebeurd toen alles al in kannen en kruken was. Toen ze de Alders taofel al an 't oprumen waren en de mussen de leste krumels d'r of pikken. Een alderkeizers slimme zet van verdeel en heers trouwens. Al die vliegtugen aover Hulshorst en Uddel za-k mar zeggen, of aover Wezep, Heerde en Epe.

En daor stao-j dan as Veluweland met oew goeje gedrag. 't Gemeenschappelijke belang umme de Veluwe op één te kriegen is vervlaogen veurdat d'r ok nog mar ene Boeing de lucht in geet. Nunspeet is solidair met Lelystad,. Harderwiek en Ermelo, pleit veur lands- en regionaal belang. Wule mutten groter denken en Lelystad zien droom niet laoten vervliegen. Ja vanzelf niet met een hoop geraos aover de eigen gemeente hen. Ze heb an de Taofel 't besluut eneumen umme de buren met een bonke lawaai op te zadelen. Dat kan Nunspeet niet verdragen met al zien campings en recreatiebedrieven.

Mar laot d'r noe bie de buren net zo veule van die rereatiebedrieven wèèn. Laot ze daor noe ok de boterham an toerisme verdienen? Nog lös van 't gegeven dat ze 't vliegveld 't dichtste in de buurte verrinneweert. Daor geniet ze alles behalve met volle Teuge. 't Gezamenlijke belang is vervleugen. Deur met de vingers nao menare te wiezen maak ze 't de Randstad wel alderkeizers gemakkelijk umme de anval van de toeristische Veluwe af te slaon. Die mep mekare wel umme de oren. Van die vieftigduzend handtekeningen op 't Binnenhof zult ze niet wakker liggen. De res van de Veluwe lig immers in september nog in de winterslaop. Ze wordt daor temee wakker emaak deur 't dagelijkse geraos van al die vliegtugen.

Merie zeg dat ik bèter nao mudde denken. Temee niet meer dat gehijg op Schiphol an, mar lakker instappen dicht bie de deure. As ik zegge dat 't rittien nao Lelystad inderdaod gloepens gauw ofelegd kan worden umdat d'r gien toerist meer is die oe een wielbreedte in de weg leg dan landt 't achterliggende sarcasme niet.De Veluwe op één in verdeeldheid. Wat Gij niet wilt dat uw geschiedt, doet dat ok een ander niet. Ik zol 't willen zeggen in name van de flora en de fauna, van de struken en de kikkers, van de hazen en knienen, die temee de klos bint. In de Randstad staot ze te schuddebuken van 't lachen. De anval op plekke nummer één in vakantiebestemming is ofeslagen nog veurdat die goed en wel was inezet. Ik legge de penne neer en schudde mien heufd.

GAIT.