Gait van de Renderklippen

Kump mien daor't Meneertien van de Krante 't hofpad in vlechten met wiedse gebaren en vrug an Merie of Gait al met zien huukien is begunnen. Die hef 'm nao mien kamertien verwezen. Met grote ogen zeg hee: ,Gait,Gait, effies de penne neerleggen want ik hebbe iets war veur mut gaon." Merie hef 'm een bakkien in etap en toen kwamp zien verhaal. ,,Heb ie wel is mee emaak Gait dat een scheidsrechter baoven zien theewater raak? Nou ikke wel. Vanmiddag in 't Oldebroek."

Hee had 't antwoord op die vraoge zelf wel in kunnen vullen, want hee weet drommels goe dat ze mien bie dat getramp met de balle niet gauw an de draod zult zien staon. Krieg ze 'm en schop ze 't dink net zo hàt weer vot. Dat laot ik graag an um aover. Mar ik mos d'r vanzelf meer van weten. Wie, wat waor,hoe en weurum. 't Ging umme Boer uut Harderwiek. Die floot de petieje tussen VIOS uut Vaossen en 't Harde. En was die dronken dan, wol ik weten. Ie ze-k dat hee baoven zien theewater was. ,,Ie begriep 't niet Gait. Nao de eerste helfte van die wedstried stunnen beide ploegen al weer op 't grös. Gien Boer en dus ok gien scheidsrechter te bekennen. Die zat nog met de snuute baoven zien thee. Ik denke zien tweede köppien. En waor as al dik honderd jaor de scheidrechter de speulers uut de kleedkamer rup veur de tweede helfte mossen noe de speulers de rechtscheiter uut zien hökkien halen." Misschiens is de thee op sportpâârk Baovenmeule zoveule bèter as wat Boer gewend is. Hoe dan ok mos hee 't onderste bettien laoten staon. Dat zal hee nao ofloop wel kold deur de sloeke hebben egeuten. Veur de baord Vinke eindigen daor alle wedstrieden in een brilstand. Hee weet bie vlagen nog van twaalf uur töt de middag niet waor as hee zien spullegies löt slingeren. Zo ok de wèke teveurten op 't sportpaâârk in Oldebroek. Nao ze mien heb verteld is hee zonder brille van Oldebroek aover Zwolle en Kampen weer op de Olde Wisselseweg terechte ekomen. Gait Jan, zien maot, ie weet'n wel de hardloper uut Odlebroek, die alle jonge vente d'r nog oflup en waorvan de oldeluu de eerste presentatiegidse van OWIOS in de klavieren kregen,hef zien beste edaon umme die brille weer baoven water te kriegen. Want Arend had zonder de fokke een ofzwaaier nao Oosterwolde emaak. De speurtocht hef gien risseltaot opeleverd. De baord is d'r ok al is met 't dikste deel van de rugge op gaon zitten en dat hef toen een diepe indruk emaak……

Ik wille de oproep van Gait Jan ondersteunen en 't volk te land, ter zee en in de lucht vraogen of ze soms de brille van Arend heb zien liggen. Opdat hee temee veur de lokale radio's weer bril-jant verslag kan doen van de voetbal. Merie zeg dat hee d'r goed an dut umme eerst mar effies een preuze pampieren in zien autogien an de kante te schuven umme te kieken of 'de brille daor niet ââns lig. Elk zut 't in 't lèven deur zien eigen brille en a-j die niet op heb raak ie van de weg of. En dat zol veur de baord die stad en land of rit veur de voetbal zo mar is waor kunnen wèèn. Gien brillen opsturen astoeblieve want a-j 't deur de brille van een ander gaot zien bi-j echt van 't padje.

De groetenisse van de dieppaorse Renderklippen. GAIT.